賤男KOL呃多名少女發生關係 《東張西望》上門追訪謝先生 對方否認部分指控但承認：我已經壞咗 精選 推薦

連日來，《東張西望》報導有關謝先生以KOL身分哄騙少女到家發生性行為的事件。謝生以往犯下多宗嚴重風化案，於2011年他15歲時，曾誘使一名13女童回家非禮及拍裸露片，而被判入勞教中心；謝生25歲時，又尾隨14歲少女進垃圾房大肆非禮，被判入獄2年多。出獄後，他竟然化身坐擁過萬粉絲的KOL繼續哄騙女生，被多名女子指控他強姦、偷拍性愛片及傳播性病，更有受害人只得13歲，實在令人髮指。

昨晚（18日）播出的《東張西望》中，主持上門追訪謝生，他本人隔著門板作回應：「我都好無奈，講真嘅，記者朋友，你都係男人，我都係男人，冇人未試過唔鹹濕嘅！我自己做錯任何嘢，我已經成為承受咗所謂嘅責任！」

謝生否認自己曾經偷拍性愛片，稱已找律師朋友商量，指偷拍的指控如果是事實，警察已經展開調查：「梗係冇啦，首先偷嘢係咪要有證人先？或者當場去揭發呢樣嘢先？第二，如果真係有偷拍，電腦、手機有晒證據，差人會拉我，我而家唔會企喺度同你講嘢啦！」主持立即指出很多受害人因為害怕謝生會流出手上的性愛片段而不敢報警，謝生繼續反駁：「我發誓同你講我一定絕對沒有！（你嘅意思係從來冇偷拍過女仔進行性行為？）你唔好同我講啲乜嘢指控，咁嚴重留返畀警方調查，唔係話呢個講、嗰個講、多人去報警就話係，我話你聽好多人都好憎我。」
有受害女生稱曾向謝生表明自己只得13歲，對於發生關係的女生未成年，謝先生表示並不知情：「你話16歲未夠，唔通真係要攞張身份證嚟睇咩？」不過，謝生承認自己曾經犯下很多過錯：「我唔係一個好人，但我而家已經冇再做任何一啲壞事。我已經返到一個好好嘅生活，有人講嘢加鹽加醋，如果我真係有做，我一定會企出嚟。我已經係壞咗㗎喇，我以前同過好多女仔發生性行為，我承認，但我而家冇，我同佢哋發生性行為時係你情我願，強姦嗰啲全部都係假㗎！我承認我以前係Fuxkboy，做過好多錯事，但我冇做過犯法嘅嘢。」

然而，謝生接下來的說詞前言不對後語，他又突然指自己會用一些手法欺騙女生：「譬如呃女仔上嚟煮飯仔、玩狗，我係用藉口去呃女仔上嚟......你唔可以話呃嘅，亦都可以換個角度睇，你情我願又得，或者係用手法呃又得。」謝生似乎覺得自己跟女生的溝通技巧高超，希望以此證明自己沒有必要強姦女生：「我一日Flirt一條女，一日約一個女仔，呢位唔得，點解我需要強姦？點解我唔聽日約過第二個上嚟？但我真係呃過女仔上床，係以前。」
受害女生指出謝生說詞的矛盾之處：「佢承認自己有呃女仔上床，咁點會變成自願呢？而我當時都係覺得有受到矇騙，或者有欺詐成分。」

最終，謝生還反過來指責受害女生，認為女仔有責任保護好自己：「你叫佢（受害女生）小心啲，叫佢唔好亂嚟啦！唔好亂咁上男仔屋企，我話畀你聽，大家都有責任，我有責任，佢有責任，佢要保護自己。當然你可以話佢細，佢唔識，佢冇經驗，但話畀你聽呢啲係要自己去承擔。」有關謝生的事件，《東張西望》會繼續追查，節目預告下集謝生承認自己「性上癮」，沉迷性行為到不能自拔。


資料&圖片來源：YouTube@TVB USA Official