張致恆罕發長文否認「借錢要老婆肉償」：要笑嘅就笑我好啦，禍不及妻兒 精選

張致恆（Steven）於2019年與粉絲區燕雯（雯雯）奉子成婚，二人因經濟狀況多次鬧不和，早前雯雯更驚爆自己已懷上第4胎，現時臨盤在即，消息引來熱議。自稱「爆料王」的KOL Sean Lam近日公開了疑似Steven找人借錢的錄音及對話截圖，內容提及：「我老婆借咗1萬蚊嚟交嘢，但係嗰個人講明3日內唔還，要我老婆出嚟肉償，如果唔係就唔使成日叫你借比我啦！我有好多嘢好煩！」

「借錢要老婆肉償」一消息被廣泛報導，Steven不忍被老屈，今日（17日）凌晨發長文作回應，直指一家受到Sean Lam網絡欺凌：「我想講嘅係網絡欺凌呢件事真係好嚴重，一件完全唔關任何人事嘅事，竟然可以畀一位網紅隨意欺凌，第一樣嘢係我完全唔識得呢一個人，亦都對呢一個人冇興趣，但係佢就一而再再而三咁樣網上欺凌我一家，其實佢係想點呢？係想睇到我哋一家自殺定係點樣呢？」
Steven承認自己有四出借錢，曾接觸「大耳窿」、「疊碼仔」等，只為小朋友能夠快樂成長：「我張致恆係曾經做錯過，喺呢4年裡面，整個人迷失到唔識行前面嘅路，入咗行咁多年嘅我，唔係話放低就可以完全放得低，所以當我冇任何辦法嘅時候，由朋友到大耳窿甚至乎澳門嘅疊碼仔我都借過錢，用盡任何辦法去借，因為我唔知道我可以點做，但係我越借就越泥足深陷，我畀其中一個缺點就係當遇到麻煩事好容易就會選擇咗逃避，所以一直以嚟我都係做錯，而家有咗小朋友，好努力去改呢一個缺點，但係都係好難，因為呢個世界總會有一啲X街想你死，講真… ...其實我真係好攰，一直以嚟死撐到而家，無非都係想見到小朋友快樂成長... ...」
他承認和朋友的對話遭流出，但強調沒有為借錢要老婆：「曾經同朋友嘅聊天對話流出，我都唔多想回應了，首先第一樣嘢我冇用老婆嚟肉償，第二樣嘢我只係講我嘅小朋友當時未搵到學校，我好驚佢要讀特殊學校，並唔係嗰位網紅所講我個仔低b，第三樣我老豆佢一直都好擔心我，佢係曾經有將佢嘅生果金畀我做生活費，但係唔係個個月畀我，只係畀咗一兩次！」
Steven承諾會儘快還錢給朋友，不希望老婆和兒子們繼續成為網絡欺凌的對象，為了最愛的家人，願意獨力承受流言蜚語的壓力：「最後我好想講，一直都好努力搵機會亦都用唔同嘅方法去搵錢，因為我真係好想還曬啲錢，無奈何收入都唔夠屋企嘅支出，所以一直都唔能夠還畀借過錢畀我嘅朋友，想同你哋講聲對唔住，我會盡我嘅能力用最快嘅速度還返曬畀你哋，至於網絡暴力同埋網絡欺凌我就冇計了，只能夠講你哋要屌你哋要笑就隨便，但係我懇請你哋要笑嘅就笑我好啦，禍不及妻兒，你哋要鬧我可以企喺度畀你鬧，你哋要笑我亦都可以企喺度畀你笑，但係觸碰到我家庭嘅任何一個人我就冇辦法容忍，雖然我唔知我有咩可以做到，但係我都會用盡辦法去反擊，因為我真係好愛我嗰家！」

資料&圖片來源：IG@stevencheung、IG@seanlam_888