《全民造星5》導演公開阿澤人品 兼爆大馬參賽者Kingston遭欺凌！ 精選 推薦

ViuTV節目《全民造星5》進行至尾聲，10強人馬包括王鋒、Nathan 魏念恩、 Snoopy 詹仕偉、Taco 黃泓祖、Lyman 香胤宅、亨仔（陳鎮亨）、Tsoul 田曜誠、王希晉、Ash 盧信宥以及KC 黃家灝，他們將於7月16日晚參加總決賽。

然而，在參賽者落力備戰之時，節目總導演曾偉樂在FB討論群組大爆內幕，表示：「《全民造星5》，係時候有啲野要了結。我今日所提出嘅野並唔係「鞭屍」或者唱衰，只係我一直都受到呢樣嘢困擾住，我必須出聲解釋。」
▲《造星5》導演曾偉樂（最左）

曾偉樂首先提到已出局的參賽者阿澤並非「某樂園聘用的工程師」，而是外判商員工。他聯絡了阿澤的前同事詢問詳情，前同事指出阿澤不是註冊工程師，並對阿澤的評價有所保留：「我哋其實麻麻地佢工作態度，當然唔清楚佢而加喺節目上人品係點，而家導師淘汰佢，我其實估係導師接觸咗佢個人係點」。節目組收到樂園通知，要求刪除阿澤為前樂園工程師的相關資訊。▲節目組人員與阿澤前同事的對話（1）
▲節目組人員與阿澤前同事的對話（2）

之後曾偉樂提起Tsoul事件，他向Tsoul道歉，表示60強時未能好好剪接交代到他做隊長和創作的難處，但阿澤、James和白水私下認為Tsoul不適合做隊長，Off Cam時阿澤更是經常串Tsoul，行為看在他人眼內。▲同事想阿澤了解Tsoul件事，阿澤似乎想引導剪接
▲其他隊員有背後出聲
▲王鋒與阿澤關係，王鋒有撐阿澤
▲20強後阿澤與王鋒對話（1）
▲20強後阿澤與王鋒對話（2）
▲20強後阿澤與王鋒對話（3）

說到參賽者不和，曾偉樂還揭發來自馬來西亞的參賽者Kingston遭到欺凌：「有負責佢嘅Writer同我講佢經常受到欺凌。我地嘅素材入面成日見到其他隊員有取笑佢口音，不過Tsoul係真係好照顧Kingston ，有次彩排Kingston冇錢搭車返酒店，得Tsoul肯即時比咗$500 Kingston搭的士。」
最後，談到最受爭議的「王鋒阿澤事件」，當時紅隊的阿澤在Dance Battle環節指責藍組的王鋒擅自改舞步，事後節目組一直有向二人了解狀況：「兩位可能心都有條刺，但就唔係有不和。以下有對話可以知道佢地事後都有交談，而且並唔係敵對關係，但阿澤係王鋒面前就有講有笑，但背後就周圍唱佢，跳舞界、參賽者、工作人員全部都聽佢唱衰過，而且有次佢地紅組聚會仲會拎呢件事嚟玩，咁究竟係唔係好傷害阿澤，我不得而知。」
曾偉樂強調：「製作組並唔係強權要捧契仔，好多嘢真係有苦自己知，好多參賽者都係我地好鐘意，每一位走我地都係有為佢喊過，海外嘅參賽者更甚，我地有送機同佢地食飯送別佢地，唔係大家口中所講要淘汰哂佢地，我地都好愛護參賽者，所以一直當大家係朋友，希望大家了解我地都有難處，始終係比賽，必須有離開既時候。」
爆料全文：

引用全民造星5，係時候有啲野要了結
我今日所提出既野並唔係「鞭屍」或者唱衰
只係我一直都受到哩樣野困擾住，我必須出聲解釋

我直接講造星5發生好多野，當中最爭議既一定「鋒澤」事件，究竟當中「阿澤」發生咩事我就逐點講下：
重申一點我並唔係要幫王鋒洗白，因為我覺得一提到件事就係只會得到結果就係幫契仔，所以我重申一下
1.有網民發現我地剪左某部分內容，其實我地係無諗住講，所以唔涉及幕後爆料，阿澤提及過自己係某樂園工程師，到節目出街之後我地收到樂園既通知，話阿澤唔係樂園所聘用既工程師要刪除該部分內容，係我地知道之前係無人提出比我地知佢係外判商既員工，最後有人自首左仲搵左佢舊同事問佢係咩形式合作
2.Tsoul事件，係哩到我要同tsoul道歉，因為當初60強既時候未能好好剪接交代到佢做隊長既難處同創作，之所以要道歉，因為tsoul處理創作內容最大，但觀眾並唔係好知道，甚至有隊員背後有邀功，的確有我地不足之處，我亦都問返剪接同事，佢話有向該隊成員了解。

從而我要提出幾點有網民既質疑
Tsoul做隊長期間係唔係只得60強有不和
答案：係，其餘round 數大家都好配合隊長
點解得阿澤講，其他人無出聲
答：因為其他成員包括james同白水無係鏡頭出聲，但私底下同澤夾好左覺得tsoul唔適合做隊長，但其餘隊員都好欣賞tsoul 隊長
究竟剪返60強出黎既動機係咩？
答：因為似乎無人了解過tsoul 係隊長之路有困難，而且和平之前既表演既成功好大來自tsoul 但我地之前無好詳細講到所以補完，同時其實成件事tsoul係唔知大家唔鐘意佢做隊長，佢只係好盡力做好隊長責任。
其實係平時有鏡頭未roll機（所謂offcam)既時候，阿澤有經常串tsoul 既行為，而我地無剪出黎，因為剪左就係惡剪，而我地選擇無剪出黎，所以我唔認同我地有惡剪佢地，

另外一樣野係最另我感覺到唔開心既當中有一位來自馬來西亞既參賽者Kingston ，有負責佢既writer同我講佢經常受到欺凌，而我亦係我地既素材入面成日見到其他隊員有取笑佢口聲，不過tsoul 係真係好照顧Kingston ，有次彩排Kingston無錢搭車返酒店，得tsoul 肯即時比左500kingston搭的士
3.阿澤與王鋒事件
其實係件事發生期間好多人都未有意識到王鋒既改step，因為好多人無跟佢地排舞同彩排，所以當刻無人會知發生咩事，我地亦事後其實有了解事件，根據當時既情況我地有叫王鋒立即向阿澤道歉及解釋，所以我亦知道阿澤有開綠燈比王鋒
，所以並唔係有冷處理件事，同時間我地知道阿澤有事既時候王鋒係好幫阿澤（可以見下圖），所以我地覺得佢地係可以和好。
但去大概round 4拍攝時候，我突然收到有一位製作人員問「阿澤件事剪唔剪呀，唔剪就有人會爆王鋒大獲」結果我地怱忙之下再叫王鋒同我地解釋成件事同拍攝道歉，所以並唔係大家眼見節目出街再捉佢補拍。

同時間我地一直有向王鋒同澤了解近況，以我認知兩位可能心都有條刺，但就唔係有不和
以下有對話可以知道佢地事後都有交談，而且並唔係敵對關係，但阿澤係王鋒面前就有講有笑，但背後就周圍唱佢，跳舞界，參賽者，工作人員全部都聽佢唱衰過，而且有次佢地紅組聚會仲會拎哩件事黎玩，咁究竟係唔係好傷害阿澤，我不得而知。而今次件事我地無選擇收起，因為對同錯由觀眾決定，所以我亦無好黑心咁抹殺件事，而且係我提議將事件公開比大家知道，只係我知道實情，亦係係ig提出兩位關係，希望大家放低件事，但以乎有律師黎做文章，我亦明白件事變成左唔係一個人既事，似乎已經變成一個團體。
4.最後一件事情係好想提出，你地提出王鋒出賣兄弟就係死罪既話，我可以話我地都比參賽者有出賣，所以你地話我地黑心？我地日日都面臨哩個問題，而出賣既人其中我地知道就係阿澤，係round 1期間曾經有試過節目變動而且根本唔關阿澤事，但佢竟然係佢tg 流出，而且仲認有幕後爆料比佢，從而我地得知有內鬼同佢好好朋友，所以我地決定自己內部不斷放流料話公司想簽邊個，結果全部變哂契仔，甚至有人話已經簽左，最後我地查左好耐知道有位幕後有參與其中一個有參賽者搞既youtube 「災難club」，而且幫手期間係未完比賽，可想而知佢地關係幾好，所以我好清楚我地製作組處於一個非常唔安全同比出賣既地步。

最後總結下我地製作組並唔係強權要捧契仔，好多野真係有苦自己知，好多參賽者都係我地好鐘意，每一位走我地都係有為佢喊過，海外既參賽者更甚，我地有送機同佢地食飯送別佢地，唔係大家口中所講要foul哂佢地，我地都好愛護參賽者，所以一直當大家係朋友，希望大家了解我地都有難處，始終係比賽，必須有離開既時候。
希望大家支持餘下既參賽者，大家既質疑我有時間會同大家講，多謝大家
題外話，有人話Ash 20強表演我地刻意剪走阿澤，其實係佢好甩step，我地仲特登剪走費事比人黑心剪衰佢，另外佢有一下整到ash個嘴，差啲影響佢下一句歌詞

資料&圖片來源：FB@造星評議會 - 全民造星討論區