肥媽教煮野食比觀眾插勁廢,睇郵輪Youtuber bob叔仲正?

純情跟蹤狂 於 13/05/2018 發表 收藏文章
話說近排肥媽又出山教煮野食,將《食平D》系列新一輯黎個大革新,同陸浩明拍新一輯《食好D 食平D》,揭開自家烹飪秘笈,高價美食隨即變得親民。所以話食得好唔等於要食得貴,高級餐廳啲菜式咁貴,喺屋企下廚仲大樂趣啦。不過新一輯同之前有啲唔同,因為今次更加順應潮流,將時令、新興、特色食材變成可口餸菜,而6號為博女友歡心,聯同肥媽合力鑽研快閃甜品。此外,肥媽仲會示範唔同類型既傳統、新潮飲品。

雖然聽落好似好多新搞作咁,其實愈拍愈衰?好多觀眾都話肥媽開始離地又hea,寧願睇Youtuber仲有心機,仲開始罷睇節目添。點解昔日喺師奶眼中係廚神,依家突然人氣大跌?


1. hea到出曬面

唔少家庭主婦投訴肥媽每次醃肉都係落燒酒、鹽、糖,之後求其掉落鑊,再加啲汁調味就上得菜,冇啲新意。最好笑係落咁多醬又話健康,事實上勁重味。第二集誇張到教整海鮮拼盤,帶6號去買貴妃蚌、鮑魚、東風螺等生猛海鮮就咁簡單清蒸就煮好。問題係鬼唔知海產夠新鮮,簡單清蒸已經好滋味?依家咁輕鬆整到仲使咩教。仲有因為佢幫八珍賣廣告,第四集竟然就咁用出面買一罐罐既蒜蓉豆豉醬加落去整豉汁煎排骨。



2. 咩都sell你要用機

例如第二集整薑汁撞奶,肥媽話唔使搞咁多野,點知轉個頭拎左支慢煮捧出黎,話要用佢先可以令到啲奶保持同控制喺同一個溫度......姐係冇部機既人就唔使整薑汁撞奶?其實要整呢個甜品根本冇咁複雜,只要有溫度計就得。將牛奶加熱至大約七十至八十度嗰陣,加入適量既糖,再喺七十五度加入薑汁,薑汁對牛奶既比例係一比十,幾分鐘就整好。

唔單止呢集,係集集都叫人慢煮,似一田啲廚具sales多過教人煮餸喎!講真煮餐飯用咁多部機,又煲湯機又光波爐等等,正常家庭邊有咁多部機?同埋呢個節目最重要係教人煮餸,真係唔明點野煮既過程cut頭cut尾,得幾個鏡頭帶過,反而賣廚具廣告既時間播得仲詳細,難怪令人頂唔順,大呻植入式廣告多到太似宣傳易啦。



▼賣廣告先係真既


相反出名喺郵輪同老婆做愛做的事既Youtuber bob叔 (「煮家男人」創辦人)就被稱為最高質既烹飪channel,因為佢教網民煮野食真係好有心機,好詳細咁逐個步驟教大家,又加字幕。驚各位悶又講下網絡熱話、政治野,口才好到有啲fans係專登聽佢吹水添架。


留言


請按此登錄後留言。未成為會員? 立即註冊
    快捷鍵:←
    快捷鍵:→