Mk仔絕對比你想像中好！網民盤點Mk仔出手相助既好人好事 精選 推薦

Mk仔可以話係香港既特色，直頭可以列為香港文化遺產。不過你對Mk仔印象係點，會諗到乜野？細細個學人食煙、紋曬身、過氣飛輪海頭、潮牌衫？定係巴閉、英雄主義、疊馬？



不如首先睇下網上對於Mk仔既普遍定義係咩先：

1. 將頭髮染成各類顏色，絕大多係mk金2. 身上面有紋身
3. 一邊或兩邊耳仔有十幾粒耳環，有啲甚至穿上唇環鼻環舌環等
4. 著既衫望落好潮，但其實襯得不倫不類
5. 中意好大聲講粗口兇人，氣勢上唔輸蝕先
6. 有好多年煙癮
7. 身材瘦弱又扮大隻
8. 性格暴躁
9. 自創潮語，中意做出位、受人注目既事
10. 喺facebook用Mk怪名，例如醉愛MK、永世罪仄 等等
11. 喺facebook有好多冇血緣關係既兄弟姊妹
12. 覺得自己好型，咩都影上網

(credit by https://www.facebook.com/yanip1012/)

你依家係咪覺得佢地明明行為同外形咁異類，但點解咁多女仔寧願揀Mk仔都唔揀你呢？呢幾日討論區上就有網民話原來Mk仔人品好好，甚至仲好過好多中年大叔。

有網民話之前做暑期工見到勁爛口、紋曬身既Mk仔，以為冇好日子過啦，點知成間鋪頭原來最nice係佢，又好有耐性教人，做錯野都唔會淨係識鬧。亦有網民憶述之前新手去飛鏢唔識開機，有個Mk仔過黎幫佢開，見佢廢仲教埋佢玩。好多Mk仔都唔會眼白白望住人死，因為佢地自己都係咁行過黎，感同身受。之所以會成為Mk仔，或者係因為以前既社會風氣，正如依家興偽韓、偽毒咁。


▼仲有其他好有愛既例子，證明Mk仔有人情味過其他人，係義氣仔女

引用五、六年前試過喺旺角天橋睇人捉殘局，嗰時中學啱啱畢業入世未深，原來係天仙局黎，望下望下會比人水左去捉兼昆錢。好彩有個係隔離做電訊sales既Mk仔扯開左我，諗番起都覺得warm。

嗰陣自己一個去籃球場練波比個Mk仔撩，一開始以為想撩交打，但原來佢教我打波，又講左好多人生大道理同叫我好好讀書...

啱啱出黎返part time，個老屎忽一下掉左堆極重既貨我手要我放上上層貨架，唔太夠高又開始無乜力，個老屎忽係隔離仲鬧我未食飯...後面班Mk仔望到合力幫我一野推疊貨上去，仲話：「咁重，想搬死人咩？」老屎忽見到呆左，事後同班Mk講左起碼十次唔該。

小編都有單野想分享，以前好細個仲返學比人迫去賣旗嗰陣，買嗰啲永遠都係紋身大漢同mk仔，西裝骨骨既人多數會反白眼直行直過，有啲仲覺得你嘥緊佢時間。所以唔好以貌取人，人品冇樣睇既，往往「仗義半從屠狗輩，負心多是讀書人」。
Mk仔唔一定係衰人，其實佢地多數係讀書唔好、外表又唔討好，但內心單純，想做啲野人注視姐，有啲仲要好好心地添。仲有佢地大部份都好有禮貌，見到有人需要幫都會幫手。反而以為讀多兩本書就巴閉啲既西裝友，寸嘴冇禮貌、狗眼看人低，做過服務業既人都知西裝友絕對係最黑人憎既西客之一。

(credit by https://www.facebook.com/yanip1012/)
(資料來源：https://lihkg.com/thread/551057/page/4)