姚子羚罕有戰鬥格成功搶鏡，陳瀅最唔掂？點評TVB節目巡禮女藝人裝扮(37P) 精選

上個禮拜2、3日無線啱啱喺灣仔會展完結《2018無線節目巡禮》，係內部向廣告客戶公佈來年於無線播出既劇集同節目之推廣活動。雖然過程被輯錄成《TVB金禧晚宴暨2018節目巡禮》，並於下星期11月18日於翡翠台播映，不過我知道大家都好關心女藝人既穿著打扮，所以等小編我依家點評一下她們的裝扮啦。

當日有大約200個藝員出席，場面相當熱鬧，而女藝人都盛裝上陣，個個非常性感，喺客戶面前爭艷鬥麗、衣香鬢影。有啲人明明做左人妻都谷行胸，有啲人件衫就出曬事，咁究竟邊個著得最靚最好睇？
姚子羚

一個字！靚！罕有戰鬥格成功搶鏡，而且佢著衫冇失過手呢下勁，好識得將自己長處表現出黎，貼身長裙將佢S字身形表露無遺。


▼幾個都好靚


岑麗香

香香公主今次揀既衫幾靚，橙紅色夠曬Sharp醒，只係下身一排鈕既設計有少少奇怪，如果冇左會更加乾淨利落。同埋髮型上略嫌師奶左啲，同女神形象唔多襯。

沈卓盈

沈大師真係好靚！條裙又靚又有仙氣，成個造型大方得體，唔會露太多亦唔會太密實，唔錯唔錯。


陳瀅

呢個look絕對可以同劉佩玥相比，藍色lace花花裙太俗氣，髮型set得唔好老左廿年，成個大陸大媽咁，浪費左好身材同靚樣呀。仲有手臀啱啱好箍實左，睇落好似好粗咁。


▼真心想問發生咩事

李佳芯

女神姐係女神，我認自己係有偏見，但都要佢穿得好睇架！條裙冇露出任何肉，但肩膀位同手係透視設計，有啲若隱若見，好正呀！


張秀文

條紫色長裙夠曬性感，擠出事業線輕易得到攝影師既注意，佢就話已經痴曬膠紙一定唔會走光。


王君馨

升呢做左人妻既王君馨似乎未有受到老公既阻攔，竟然露肉部份比以前更加多，只係著左bra top谷出心形胸。事後頭條日報訪問佢，原來佢冇比老公睇過就直接穿出黎。

高海寧

上次星和成為最失敗造型得主，因為上身好鬆泡泡，下身著貼身褲一啲都唔襯。呢次就醒水著左中門大開既西裝，佢話想行比較型格既路線，但又想keep返女人味，所以揀左褲款，裡面真空。

陳自瑤

件衫係露到胸，不過有啲老積，襯埋個頭就好似外國唔知十幾世紀嗰啲婦人咁。其實yoyo唔係後生，應該揀啲sharp啲既色，同埋young啲既髮型嘛，明明keep得咁好唔好嘥。


胡定欣

今次比起上次星和頒獎禮失色左，首先露唔露肉唔係重點，件衫靚就得，問題係件衫麻麻地。整體套衫係幾靚，只係肚上面個心心似人地喺深水埗買左啲材料返黎縫上去咁，拎走左個心心應該好好多。

李施嬅

今次胡定欣講到明唔露肉，特登比姊妹搶鏡，佢以DeepV現身中門大開冇錯係幾有驚喜，只係個頭束得太緊，令我諗起星戰莉亞公主。


朱晨麗

蝦肉色既裙好好睇，雖然冇露胸但夠曬高貴，特登喺腰位開左兩個釵比少少甜頭我地，非常鬼馬。

陳凱琳

你知啦陳凱琳身形係非常瘦削，理應唔好揀啲流線形既晚裝，不過嗰晚佢就著左黑色貼身長裙，個釵仲要開到上條腰，成個人即刻拉長左。原本已經長既身形更加長，望落唔多美觀。

麥明詩

件衫好似婚紗不過都冇乜問題既，係覺得冇設計好空虛，太過簡單。同埋個髮型好直好貼，佢唔係好襯咁樣。化妝上條眉又重手左，冇啦啦多左份英氣。


馮盈盈

長曲髮加埋透透地既花花裙，係仙子呀。同麥明詩一樣都係露肩既蝙蝠䄂，但馮盈盈件衫多設計啲，又比較飄逸，相對上係加好多分既。


黃智雯
我覺得作為胡說八道會既成員喺襯衫上都唔會太差，上次星和用左比較大性既西裝突出女人味，今次就著返掛頸貼身長裙，上圍豐胸，搶曬姊妹鏡呀。


劉佩玥

阿Moon出事喇，件衫好大問題！首先明明阿Moon條腰唔係重點 (唔算幼呀因為)，但套衫冇露手、露腿、露胸反而只係露到腰，就好似普通喺街邊買到既一件長袖白衫咁同白長裙咁.....加埋中分頭同埋女人街既銀圈耳環，我有理由相信造型師係想玩野。