有咩正得過女朋友肯比返飯錢我?

純情跟蹤狂 於 30/04/2017 發表 收藏文章
呢排有單新聞都幾爆,就係話一對男女去牛角食野埋單2000幾蚊,點知最後竟然大打出手!初初個個都以為一定係個女人唔肯比錢啦,成2000幾蚊喎,跟住網民判官上身鬧爆佢「港女」、「八婆」。點知件事最後水落石出,原來係個女人想AA制,但男人就一手撕爛左佢張1000蚊,再自己另外請佢........一睇到呢度係咪好無言......好明顯係個男人要面子,就ON_ _地將金牛整爛算。



我話呢個男人真係唔識揀,呢啲女仔先係最好,就好似我女朋友咁。

仲好記得第一次食飯,我準備轉身埋單,比完錢一行出鋪頭門口,佢就塞左啲野埋黎。

「喂 頭先餐飯錢吖!」當時未係女朋友既佢截住我。
我瞪大隻眼同佢講:「唔洗啦!你係女仔黎架嘛,請你食好應該架!乖,收返啲錢啦。」
「唔制!!!依家月尾,你唔夠錢使架!!」
「我夠呀~拿唔好再塞比我喇」
「哎呀,你揸住啦..............」
講完佢即刻將張一百蚊攝落我褲袋度,唉 真係次次都唔夠佢黎既......

最後我同左佢一齊,咁耐以黎呢個女朋友都係慳家精黎。平時紀念日想氹佢開心,買左Pandora比佢,佢話唔要,叫我退返比人喎。其實我食少幾餐想佢開心姐,點知呢個衰妹係都唔中意名牌同貴野,就連食飯都唔想我請佢。其實我知佢個心諗咩既,佢想我留返啲錢呀嘛,佢知道我一直好想買部波子揸下,所以成日唔比我送貴野比佢,咁我又何嘗唔係想盡下男朋友責任呢?

弊喇不過女朋友就黎生日,點算好....完全未諗添。送玫瑰花比佢?唔得啦佢實話我嘥錢。送首飾比佢??貴呀一定唔得啦。好啦真係要最後決定,諗住自制個蛋糕比佢,但係我又唔撚識整。好彩臨時我老死識得酒店師傅可以教我整蛋糕,雖然......整一個蛋糕收我成千銀 (係咪點我)。如果比女朋友知道左,佢實唔肯食.......睇黎我要諗下計仔先得。


「...搞掂!」我放埋最後一塊花辮就佈置好,望望錶先,佢應該差唔多到架喇喎。嘿嘿,喺我屋企搞就唔會比佢話啦,如果我一開始Book酒店?佢叫人退房都似...


「喂我到喇...嘩..好靚呀......咦你用左幾多錢?!」佢終於到左。
我好醒咁答:「bb~~~~我專登上網學整架 你中唔中意?」
佢個眉頭開始慢慢放鬆 我就知得左!

唉其實我好想佢開開心心,永遠都笑到好似依家咁甜、咁可愛,為左我既願望,為左令我開心,佢冇委屈過。佢話過我開心,佢就會開心,因為佢最大既願望係見到我滿足。但其實我最大既願望. 就係將我所有 比曬佢呀。

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • Chan Chun Him
    Chan Chun Him 於 30/04/2017 評論 NO. 1

    叮噹妹

  • Henry Chow
    Henry Chow 於 30/04/2017 評論 NO. 2

    女友如圖?

  • Ricky Leung
    Ricky Leung 於 30/04/2017 評論 NO. 3

    有,AA

  • 卡神卡神
    卡神卡神 於 01/05/2017 評論 NO. 4

    AA制有咩問題?如果對方食餐飯都比唔起我都唔會介意幫佢比,但要講出來

快捷鍵:←
快捷鍵:→