《愛回家》一集比一集高質,Terry大小姐爆seed扮IT狗同死狗

純情跟蹤狂 於 08/10/2018 發表 收藏文章
處境喜劇《愛回家.開心速遞》不嬲都同其他劇集唔一樣,題材好貼近後生仔同埋網絡熱話,內容貼地寫實。上個禮拜《愛回家》就比觀眾大讚好睇到可以拎奧斯卡,一集比一集高質、搞笑,主角分別係單純到無人有既Terry(李偉健飾演)同埋佢家姐大小姐(林淑敏飾演)。首先Terry嗰集「我是IT狗」就正正講左做IT部既辛酸同埋世人既誤解。自從Terry上次喺保安部做事錯漏百出之後,大小姐就決定將佢調去其他部門,唔好再禍害其他人。咁啱呢個時候IT部有人辭職,迫於無奈之下Terry就做左IT狗。

Terry一入IT部就講到明自己只係識開機閂機,佢以為做IT淨係打下機就過日晨,點知原來一個IT狗唔單止要識點樣整電腦,仲要配合公司業務發展,防止黑客入侵。Terry聽完如夢初醒,即刻同其他同事自我介紹,點知三位戴黑眶眼鏡、著格仔裇衫、頭髮又油又笠既IT狗只係望左一眼就即刻望返mon。原來佢地慣左用whatsapp group交流,無論講人壞話、覆上司要求、講靚女都唔會正面傾,貫徹大眾既毒男形象。最好笑係三人叫做keyboard、CPU 同Mouse,簡直毒到出汁。咁毒搞到舊同事Margin都忍唔住返黎寸佢地,叫佢地索性轉行做金融。


其實整電腦唔係想像中咁難,因為好多人對電腦毫不了解先覺得好複雜,對於IT狗黎講好多時很多死機只係普通問題,只要第一時間檢查按鍵再重新開機,好大機會行得通。Terry學左呢個方法之後果然整返部腦,令大家刮目相看。就算遇到解決唔到既問題,只要講啲人地唔識既名詞:「我估係裡面CPU散熱不良引致系統唔穩定,加上新增記憶體種種問題,我要返去慢慢修理...」就比人一種好勁既感受。最後Terry終於做到成績,改名做wifi融入喺IT狗之中,變成滿面油光、著格仔衫,唔善於講野既人。

面對公司比黑客入侵,Terry擔任零食部陪大家一齊奮力作戰,畫面即刻變左做《22世紀殺人網絡》,搞笑之餘亦為IT部平反──雖然加人工冇份,裁員係第一個,但IT部同事唔係狗係人,唔可以連自己都睇唔起自己,相信觀眾睇完都覺得滿腔熱血。




你以為IT狗已經夠好笑就太低估編劇,「啤啤的後裔」甚至令好多觀眾都大叫崩潰!原來大小姐想爸爸大龍生(羅樂林飾演)重視佢地中房,所以極力爭取威龍藥房代言人之位。佢明知爸爸中意自己隻狗,覺得好腳頭,所以提議將愛犬Nikita四隻新生狗仔做生招牌。

因為四隻狗仔住Nikita同熊家愛犬啤啤親生bb,大龍生打算將其中兩隻分比啤啤湊,搞到大小姐好不滿,仲詛咒Nikita生出來既狗仔一啲都唔似啤啤。後來Nikita生完出黎,嗰四隻狗仔不但同爸爸啤啤唔似,唔講都唔知Nikita係佢地呀媽。眾人好疑惑,終於諗到應該係Nikita走失嗰陣同沙皮狗一夜情,搵唔返經手人先唯有叫啤啤做便宜老竇。不過如果比大龍生知道佢地唔係啤啤親生一定會怪罪大小姐,於是佢地決定做場大戲扮狗仔已經全部夭折,KC(歐瑞偉飾演)準備好時間、地點,等之後死無對證。


之後大家戲精上身,例如大小姐爆喊、KC震驚、大小姐喊到聲嘶力竭、KC心死,每個表情、每滴眼淚非常逼真,Terry見到大家既演技都自愧不如。但係未完架,靈堂先係戲肉,熊尚善(滕麗名飾演)早就洞悉真相,加入做埋呢場大龍鳳。佢瞻仰遺容嗰陣望住空棺材,竟然攬住大小姐兩個爆seed係咁喊。Terry睇到呆左,好天真咁講左句:「原來佢地比我更好戲,抵我退出娛樂圈。咁又係既,佢想喺電視電影圈發展就一啲演戲天份都冇,反而全家上下加埋員工Peter都比佢好戲,自信心即刻重創,好慘。


如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→