復仇者聯盟鐵膽個個傳退出,馮德倫要做寒冬戰士?

純情跟蹤狂 於 09/10/2018 發表 收藏文章
幾日之前飾演美國隊長嘅Chris Evans喺Twitter宣佈已完成《復仇者聯盟4》所有拍攝工作,代表佢做左八年,始終要正式退出Marvel電影系列喇,真係好唔捨得。雖然唔少影迷粉絲仍然未接受事實,不過依家有好多外國網民紛紛猜想美國隊長嘅接班人人選,有人話係寒冬戰士,仲有香港網民估係周柏豪。唔單止佢,有傳聞話另外三個非常受歡迎嘅角色Iron man、變形俠醫、雷神都要退出復仇者聯盟啊!嘩如果係真嘅話,四位Marvel鐵膽走晒實會造成Marvel宇宙洗牌,同時意味住有更多新角色出現。

不過你又有冇諗過,如果新復仇者聯盟英雄嘅扮演者全部變成亞洲明星,效果會點呢?唔好以為好劣質,因為昨晚有網民就高質改圖,推港版復仇者聯盟。啲圖一上載「巴打絲打facebook club」之後得到勁大回響,個個大讚P圖後毫冇違和、好傳神,特別郭偉亮、徐錦江改圖前後根本冇分別,最好笑係連唐三藏羅家英都過檔Marvel。

1. 黑豹:樊少皇

唔拼埋一齊都唔知Chadwick Boseman同樊少皇堅係有幾分相似,佢地嘅濃眉大眼加埋鬍鬚好似孖生咁。


2. 變型俠醫:羅莽

羅莽身形一向健碩,做變型俠醫就啱晒,如果佢出招「自投羅莽」實可以嚇窒對手。


3. 緋紅女巫:謝安琪

小編估因為謝安琪做過《殭》,所以位改圖巴打就拼左落緋紅女巫度。不過網民唔多buy,話冇放大睇仲以為係杜如風,建議搵不老女神邱淑貞好過。


4. 雷神:徐錦江

呢個咁經典唔使我多講都知幾似,簡直一模一樣,好多網民以為冇改過圖添啊。


5. Iron man:郭偉亮

呢個都係另一個經典,似到太興都搵佢拍返條同Marvel風格差唔多嘅廣告。


6. 美國隊長:古天樂

一個黑一個白應該搞笑多,有人提議陳豪、吳彥祖好似好啲。


7. 寒冬戰士:馮德倫

第一次見到寒冬戰士有啲熟悉嘅感覺?你係咪覺得好似馮德倫啊?因為佢個樣都鬼鬼地,除左髮型之外連個樣都有少少似,勁match。


8. 奇異博士:張松枝

張松枝唔係比人話係港版孔劉咩?依家突然又變左外國人做奇異博士?有網民覺得搵吳岱融襯啲,或者陳啟泰、河國榮就仲似。


9. 黑寡婦:楊怡、朱茵

搞笑咩!Scarlett Johansson同楊怡大纜都扯唔埋。網民笑上圍差別太大喇。


▼起碼要女神朱茵咁靚咁玲瓏浮突先似啲


10. 蜘蛛俠:羅家英

救命,估唔到除左頭套原來係咁。由老人家扮一個後生仔太好笑!特別係搵家英哥,笑到流晒眼水出嚟啊。


(圖片來源:巴打絲打facebook club)

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→