古天樂被迫翻跳黑歷史《今期流行》,睇佢反應就知首歌好大陰影

純情跟蹤狂 於 30/07/2018 發表 收藏文章
古天樂係好多人心目中既男神,佢初出道喺無線拍電視劇既時候仲係白雪雪,早前有人搵返佢啲劇照先發現飾演楊過既佢成個金城武咁,絕對靚仔過韓星,就算依家為左風水問題曬黑左都魅力不減。古天樂除左係個外貌突出既偶像之外,仲兼任演員、模特兒、電影監製人、眼鏡設計師、收藏家、玩具專欄作家,係個全能明星。

佢演技出眾,早期拍時裝電視劇好快已經榮升做一線男演員,之後憑《刑事偵緝檔案IV》中飾演既徐飛警長獲得「我最喜愛的男主角」一獎、《創世紀II天地有情》既大反派獲得「我最喜愛的電視角色」、《尋秦記》裡面既項少龍再次獲得「我最喜愛的男主角」同「我最喜愛的電視角色」,呢套劇甚至變左做經典穿越戲,依家仲有好多觀眾會翻睇。另外影壇上古天樂成就更高,警匪片一定會見到佢,演出過多部大片,仲以《殺破狼・貪狼》贏到影帝。唔單止事業上好有實力,喺慈善上更加不遺餘力,特登成立左「古天樂慈善基金」喺大陸唔同地方起學校比小朋友個個有書讀。


雖然古天樂人生望落好完美,應該冇咩遺憾,不過對於佢黎講有件事一直係黑歷史,講到明係人生污點,次次睇返都會一臉尷尬!講緊唔係古天樂廿歲因為搶劫而要服刑22個月件事,而係佢明明唱功麻麻仍然被迫成為歌手,仲要跳《今期流行》。無論出席活動定係MV,古天樂都唱到硬曬軚一啲感情都冇,又要跳埋啲奇怪拜神舞,似足矛山師傅請神,搞到比人笑到今時今日,拎黎同唱歌每粒音都唔準既黃宗澤相提並論。

有次肥姐搵古天樂做訪問提返起呢件事,笑佢唱歌普普通通,跳到似拜神咁,問佢係咪跳七十年代既靈魂舞。當時佢即刻黑面,之後比面肥姐一個假笑咁尷尬帶過。肥姐繼續笑,話古天樂個練舞老師發瘟,旁邊楊千嬅聽到笑到收唔到聲。


後來古天樂自知冇咩天份,一直努力避開,講到明「唔會再唱歌」,希望以後唔使再當眾表演。今年三月王梓軒唔識死喺香港電影工作者總會春茗上當住佢面唱《男朋友》,仲將咪交比佢想合唱,最後古天樂唯有黑住面咁細細聲唱。

點知近排古天樂又比百老匯邀請同容祖兒拍廣告,成班女仔喺佢面前唱改編版《今期流行》,圍住佢迫佢唱埋一份。當大家好期待佢會開金口既時候,古天樂一句:「痴線」打破眾人幻想。網民個個失望而回:「古仔有落場但都唔肯拜神,好無誠意姐」、「以為古天樂跳舞先入黎睇」、「開頭三分鐘等我仲以為古仔會著粉紅色衫跳埋一份」,不過有人道出真相,其實佢打死都唔肯跳,睇黎當年呢隻歌既公眾反應真係令到佢有好大陰影,可能佢自己發過毒誓唔再跳。亦有網民估百老匯budget唔夠先唔跳,希望集氣比個廣告出2.0版,等古天樂真正落場跳返次。





▼完整片段

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→