冇玩過呢5隻game唔好叫自己做香港人！依家啲手機game根本冇得比 精選

好喇今篇請原諒我會用返口語講既，因為呢篇野應該等香港人有共鳴架啫！我喺度諗我地細個嗰陣其實已經好幸福，老竇呀媽嗰陣都未有電腦，去到我地呢代已經有。我仲好記得當時唔係個個都有電腦，所以一放學大家就會跑去電腦室或者屋邨附近既青年空間/網吧打機。以下五大電腦遊戲應該大家都有玩過啦，未玩過？你啱啱出冊呀？

Little Fighter 2

多數人會就咁叫做LF2，係喺1999年由中大計算機科學系學生合力開發既動作遊戲。LF2都好耐歷史喇，由佢一出就玩到依家，我個friend就用開冰佬，我就透明人(啲名其實係亂改，但大個發現原來個個都係咁叫lol)。


跑online

「留在彼此的身邊，牽著手再繼續飛...」嘩嗰陣聽到呢首歌幾pure呀，先發現原來跑都可以咁好玩(廣告mode)！嗰陣我係因為張敬軒先入去玩既，買點數卡買到勁窮，日日晏晝lunch淨係啪左幾粒燒賣咋陰功。


新線上遊戲地帶

傳送門：http://sunzonehk.com/home/

以前真係成日玩，係回憶黎！如果你未玩過真係要打「救」你呀。最經典一定係「終極超音鼠」，成日快得濟撞到啲釘，玩到背脊都濕曬。同埋「玩火遊戲」又係必玩既game，兩個人喺keyboard激戰，好多人因為呢個game識左唔少朋友架。「無個性戰隊」一定用灰色人同gba模擬器，當時要去平水相逢到dl d gba檔架，又係電腦堂必玩既。



星夢online

我不得不承認自己好狗，有睇攻略先打既，為左咩呀？為左威囉！為左比同學讚囉！依家雖然返返黎重生左，不過始終電腦介面先係正宗架嘛，依家不倫不類咁。我記得以前仲同人交換過msn，扮做女仔同左個男仔網戀左幾個月，大家互相叫老公老婆，嘩種心動既感覺依家冇可能搵得返囉。

蕃薯寶寶

傳送門：http://kids.yam.com/

因為我實在太想養寵物，不過呀媽唔比養，所以喺網上面種左隻蕃薯出黎，平時要餵佢食飯 (都係揀我自己中意食嗰啲比佢食)。點解我會記得佢呢？話說我近幾日去搵返佢睇下佢點，見到佢已經乾到梅曬，原來咁就10年喇。



但依家已經沒落曬冇人玩喇..因為出出下好多online game都係hea出，加上個個有部智能手機仲邊會用電腦打機吖！呢啲手機game sell白痴同速食，越玩越悶，冇左同friends打怪既意義。同埋重要既唔係遊戲本身，而係一齊玩既朋友。依家小朋友掛住讀書，大朋友又係咁做野，冇架喇.........時光一去不復返。