有頭威無尾陣，《平安谷》大結局膠到出汁 精選

係炮灰檔播映既大台劇集《平安谷之詭谷傳說》開播以來都取得唔錯既收視同口碑，首週平均收視更高達26點，處身係呢個「26、7點都好X高！」既年代，一套係炮灰檔播映既劇集可以攞到咁樣既收視實屬難得，《平》事實上又有幾個精彩既場面，比如青蘭被迫與亡夫陪葬，其後自焚犧牲自己拯救平安谷既女人，係播出期間都引起左唔少觀眾既討論，而劇集尋晚就播出大結局，正當貧僧以為《平安谷》會好似兩年前既《刀下留人》成為炮灰檔「神劇」既時候，最後兩集就令到貧僧大失所望！
第十九集講到二奶奶蘇玉華為左救女而同阮兆祥飾演既伍管家打起上黎，間接令到祠堂被燒毀，而村長劉江仲意圖借烏公公之死一事清算少婦聯盟。呢個時候伍管家竟然帶左班山賊入侵平安谷，仲勞役所有村民，要去地去掘金礦。耐何呢兩集劇情實在去得太快，形成左唔少「膠」位:

膠位1:山賊入侵，成村只係死左一個人
山賊入侵平安谷，唔計比少婦聯盟炸死既伍管家，成條村只有一人被徐榮飾演既山賊頭目所殺，黃浩然仲多次暗算徐榮都冇被後者殺死；韋家雄飾演既保甲亦多次當面頂撞舊戰友徐榮，但後者都忍氣吞聲，究竟呢個山寨王係太天真定係太仁慈呢？
膠位2:弱雞山賊，一打就暈
其中一幕講述山賊利用平安谷村民做人肉盾牌抵抗政府軍既圍剿，而少婦聯盟幾個女人就去伏擊山賊，一棍就從後扑暈佢地，幫助前來營救既政府軍係一槍不發之下和平解放平安谷，班女人咁鬼勁，其實邊洗叫救兵?

膠位3:劉江又「講呢d」
有劉江既場合，又點會唔「講呢d」呢?而平時專制到極佢竟然勁順攤同班女人道歉！另一邊廂，三奶奶同二奶奶突然仲重修舊好，前者仲協助後者去刺殺伍管家，突然有咁大既轉變令到觀眾大感到困惑。

原本《平安谷》都係算一部唔錯既劇集，但奈何最後幾集既劇情發展得太快，好多事情草草交代就算，令到唔少觀眾睇完大感困惑，而劇情後段亦因而支離破碎，原本要五集交代既劇情用左兩集交代就算。先前黃浩然係宣傳時提及過會有鞭打陳凱琳同蔡國慶既戲份，但呢兩段劇情都係沒有播出，睇黎都係被刪剪居多，而結局播出之後亦有唔少網民投訴剪接太差，令到劇情散亂。的確，貧僧都覺得當中有好多劇情被刪剪左冇播出，實在是一大敗筆！