KOL網民群起圍插，奇華月餅廣告被指「唔老黎」? 精選

仲有半個月就到中秋節喇!早係幾個月前各大餅家已經推出左唔同既廣告做宣傳，老牌餅家奇華就一如以往搵左曾志偉同劉心悠做TVC既男女主角，但廣告推出之後一眾KOL同網民都群起圍插廣告「唔老黎」，究竟原因何在呢?


1.用錯花
大家知唔知道係曾志偉前邊既係咩花?冇錯，就係又名為曼珠沙華既彼岸花。呢種花係日本係被視為不吉祥既象徵，因為花開時不見葉，有葉時不見花，彼此永不共存，所以係日本人眼中彼岸花係象徵孤獨同分離。大台前年播出既古裝劇《刀下留人》就包含左彼岸花既元素，男主角既名字葉常綠(黃德斌 飾)同女主角既名字花蕊紅(邵美琪 飾)就係取至呢個典故，而《刀》既結局係花蕊紅被葉常綠斬首，亦係寓意花葉不能共存，必須承受分離既意思。因為咁有網民就認為係中秋呢d象徵團圓既節日用象徵分離既花做裝飾係勁「唔老黎」！但貧僧就認為呢點值得斟酌，因為係中國，彼岸花都有代表吉祥的意思，而中秋係中國傳統節日，用返代表吉祥既彼岸花又有何不可呢?

Source:http://wujiayu520.pixnet.net/blog/post/248224403-%E5%BD%BC%E5%B2%B8%E8%8A%B1%E7%9A%84%E8%8A%B1%E8%AA%9E%E6%98%AF%E4%BB%80%E9%BA%BC%3F

2.曲調哀怨悽美
TVC既曲調係取自《太湖船》並重新填詞，但兩把演唱既女聲同樂器既曲調實在十分悽美，完全冇中秋喜慶團圓既氣氛，臨尾兩句歌詞左一句「想起你」右一句「想見你」仲令貧僧諗起望夫石既故事......

3.劉心悠造型嚇人
心悠一襲白衣仲要擔住把油紙遮，當堂女神都變女鬼，FB專頁《爆笑貼圖區》版主更出post指有眼利既網民發現海報上既心悠係呈現半透明狀態，仲整合埋海報其他「靈異」之處，令人不寒而慄！同時有網友笑稱以為自己睇緊經典靈異劇集《大鬧廣昌隆》既宣傳海報！

同場加映:中秋用藍白燈籠?!
FB page《倫敦人妻先生手記》既版主發現香港機場網店竟然用藍白燈籠圖片做宣傳，以前既華人只會係家中有喪事既時候先至會掛藍色或白色既燈籠出門口，提醒其他人户主家中有人離世，係喜慶節日用喪事用既藍白燈籠真係「大吉利是」，但設計師竟然可以犯埋呢d低級錯誤，仲隨時引發關公災難，呢鑊貧僧真係唔知點幫你地兜喇......

Source:爆笑貼圖區、倫敦人妻先生手記