《2017香港小姐競選》三甲誕生,伍樂怡邱晴大熱倒灶

方丈 於 04/09/2017 發表 收藏文章
左起:何依婷、雷莊兒和黃瑋琦

《2017香港小姐競選》曲終人散,同過去兩年唔同既係今年出現爆冷賽果,賽前被大家睇好既伍樂怡(8號)同邱晴(6號)皆三甲不入,芳齡23歲既5號佳麗雷莊兒爆大冷奪得后冠,兼且仲攞埋「最上鏡小姐」,而亞軍同季軍則分別由何依婷(1號)同黃瑋琦(4號)奪得。而去屆「友誼小姐」得獎佳麗張寶兒既妹妹張寶欣就攞到「Big Big Channel最受歡迎香港小姐」,仲係家姐手上接過獎項添!


賽前兩大熱門伍樂怡同邱晴大熱倒灶並唔係冇原因,事關兩位佳麗係問答環節既表現都唔太好,前者表現緊張,對答唔流暢,至於後者既表現更加令人啼笑皆非,Big Big Channel用戶問邱晴「如果Do姐同宣萱跌左落水,佢會救邊個先?」佢先笑笑口話自己唔識游水唔識救,森美追問如果唔識游,但可以累死其中一個,咁邱晴又點揀?估唔到佢話自己會跳落水,同Do姐、宣萱一齊同歸於盡,兩位一聽答案立刻耍手擰頭,觀眾聽到邱晴既答案後全場爆笑,老衲聽完之後亦表示『黑人問號』!畢竟邱晴入世未深,有d怯場搞到語無倫次,可能亦因為咁所以就早早被人foul左。


但其實個賽果都惹起唔少爭議,事關決定冠亞軍個陣,由8名評判投票決定既賽果老套地出現『打和啦!Super!』既情況,而決定冠亞軍既重任就交左比德高望重既Do姐去做決定,因為係今屆制度下,只要最終係打和既話,就會由「美麗導師」校長Do姐鄭裕玲做最終決定,變相Do姐一人有兩票,而佢最終亦選擇左5號佳麗雷莊兒成為冠軍,有傳媒就呢個爭議搵Do姐解畫,不過佢只係霸氣掉低一句:「呢度我係校長,我話事!」今屆港姐競選隨住一片爭議聲落幕,點都好,老衲亦在此恭喜一眾得獎既佳麗!


如果喜歡我們的文章,請即分享到︰

標籤: 香港小姐  

留言


請按此登錄後留言。未成為會員? 立即註冊
    快捷鍵:←
    快捷鍵:→