【包飲包食】令人有少少失望嘅抹茶館 Maccha House

莎包Mind Too Wild 於 14/04/2014 發表 收藏文章
上個禮拜約咗幾個舊同事出嚟聚舊,就近近地揀咗我公司附近嘅荷里活廣場食飯。其實一直都心癢癢想試《抹茶館》,因為見到佢 D 甜品好吸引,而且我本身幾鍾意綠茶/抹茶味,唔試過都唔安樂。


打開餐牌,見佢飲品種類幾多,但好可惜非大部份都係牛奶抹茶類,對於好似我依類唔飲得牛奶嘅人,真係好無奈。於是我問服務員,可唔可以將牛奶轉豆奶,點知佢話唔得,認真失望!


惟有叫杯「雪糕綠茶」,雪糕又細舊,抹茶味未至於淡,但濃返少少會好D~


食物方面,都幾啱女士口味,而男同事則覺得唔多嘢揀!

我就揀左人氣之選嘅「卡邦尼溫泉蛋烏冬」,而S 小姐就揀咗「吞拿魚三文魚親子刺身丼」。一般食卡邦尼意粉,醬汁係偏為濃杰,依個烏冬就好稀,搞到食落去有少少怪。


S小姐個飯睇落唔錯,D三文魚都算新鮮~

食飽當然到甜品時間喇! 我哋分別叫咗「抹茶軟心朱古力芭菲」、「士多啤梨白玉紅豆芭菲」、「朱古力香蕉抹茶吉士銅鑼燒」、「抹茶軟雪糕白至餡蜜」

D軟雪糕唔夠凍,嚟到已經溶溶地。而個軟心朱古力甜到cher 喉,最底嗰層好似係蒟蒻,就算有D抹茶汁,都完全無味!


其他甜品,好睇唔算好食~ 試過一次已經夠!


【總括食評】

味道:好一般,抹搽味唔夠抹搽,完全嘥左「抹茶」主題
環境:裝修OK,有卡位坐,算係舒服
服務:店員反應慢,人手又唔夠
衛生:OK
抵食:麻麻地⋯⋯價錢唔係貴,但相比食物質素,我會覺得唔值

★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆
你嘅支持,就係我嘅原動力,請畀個LIKE我喇~
個人Facebook Fan Page: https://www.facebook.com/Mind2Wild


歡迎大家跟我聯絡啊~
Email: mind2wild@gmail.com
★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆

留言


請按此登錄後留言。未成為會員? 立即註冊
    快捷鍵:←
    快捷鍵:→