【影評】香港地道Cult片~那夜凌晨,我坐上了旺角開往大埔的紅Van《值50分》

莎包Mind Too Wild 於 14/04/2014 發表 收藏文章
近期話題之作《那夜凌晨,我坐上了旺角開往大埔的紅Van》,由高登殺上出版界再殺到電影界,人人都期待到底有幾好睇。有睇過原著嘅朋友/同事都期望不大~ 今日就趁住放假,就平平地用50蚊買張飛去睇下會有幾爛,結果⋯⋯
【電影大綱】
改編自同名暢銷小說,《那夜凌晨,我坐上了旺角開往大埔的紅VAN》是一個以懸疑驚慄手法包裝,透過一台通宵小巴與十七位乘客的經歷,來刻劃現代香港社會的故事,探討末世環境下的人性愛情、因果宿命、核能環保等問題。如果世界人口消失於一旦,作為現代都市人的我們,是否真的能夠應付「求生」這學問?為了重拾昔日生活,回到正常世界,你又願意作多大犧牲?

【包包觀後感】
結果⋯⋯依一套戲係以懸疑驚慄手法包裝嘅『笑片』!全場嘅人好多時都笑到出聲,真係估佢唔到~

陳果嘅戲,早在十幾年前睇過,嗰陣時嘅《香港製造》拍得非常出色,完全帶出香港特色同情懷。事隔十多年,陳果再度回歸,或者可能係原著故事影響,感覺比以前有點遜色。若果要選能拍出香港地道風味嘅導演,以前嘅陳果可稱為代表,依家反而我覺得彭浩翔已取代佢嘅地位!

講返《紅van》,本身我無睇過小說版,只係聽同事講過話開頭嗰陣真係幾好睇,但結局係爛尾!點知,開場頭十幾分鐘,我已經覺得好多嘢好牽強,好似為交代而交代。車入面嘅人又太輕易一齊發現唔妥同埋下定論,講真依家嘅香港人比較冷漠,就算覺得唔妥,好多人都係唔會出聲~


當各人各自散水後,每人都收到怪電話,嗰一刻覺得好鬼老土,心諗:「仲玩午夜凶鈴橋段?唔係呀化⋯⋯」
之後仲要一齊分析音頻訊息,大玩摩斯密碼,仲要用埋software翻譯同溝通, 完全 cult爆!


當車上嘅人一個接一個死去,大家都集中喺茶餐廳相討對策,一傾之下,阿池(黃又南)先提起佢遇見到幪面人,而幪面人竟然係個日本人,並留下幾句線索。既表達唔到懸疑,亦未免拖得太耐,好九唔搭八。


再嚟就係阿池係屋企收到女友電話,話原來佢已經失蹤咗6年,警察派人跟住Major Tom嘅訊號去大帽山搜索亦無發現。之後,阿池同返其他人講返件事,大家無啦啦係度估邊個做特首。Come On~ 搞笑都唔好搞到咁離題呱!


接住大家了解接觸過死咗嘅人,就會被傳染而死。最後,大家決定離開茶餐廳去大帽山查過究竟,於是係超市掃貨同搵防毒裝備。好想知,點解超市有水靴同醫院用嘅衛生衣呢?細間嘅超市正常係無依類型嘅物品買架喎~


同埋,如果係因為傳染而死,佢哋成班人一開始已經無用防毒用品,要感染一早就感染咗喇!駛乜到最後搞咁多嘢,好似盲輝話dry :「做乜著到好似董太咁?」


【總括】
如果大家唔係抱好大期望,或者當笑片去睇依套戲,咁可以話幾好睇嘅~

但若果你真係當係有邏輯嘅懸疑片去睇,咁一定會好失望。最多只可以話係港式科幻電影,無乜邏輯可言,要記住:「睇故唔好駁故」,咁就自然講得通!

★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆
你嘅支持,就係我嘅原動力,請畀個LIKE我喇~
個人Facebook Fan Page: https://www.facebook.com/Mind2Wild


歡迎大家跟我聯絡啊~
Email: mind2wild@gmail.com
★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆★ ☆

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→