【#Nj評《加勒比海盜:惡靈啟航》】有Sparrow表演雜耍才是《魔盜王》

話說我對於《魔盜王》系列的感情是咁樣的,VCD睇過第一集覺得嘩好正呀,入戲院睇第二集好好笑喎,睇第三集唔知講乜好悶瞓著覺,第四集連Orlando Bloom都唔玩亦因前一集留下巨大心理陰影直接放棄,來到今日再次拿出勇氣買票。老老實實,Johnny Depp都係同樣方式演繹,劇情你亦都估到,跌跌撞撞追追打打搶寶藏,不過我覺得未至於要俾劣評。娛樂片嘛,開心笑下滑稽動作每個難關都解決得理所當然,有緊張有笑位有動作,我滿足了。人物關係夠簡化,目標清晰,總之就係有大奸角要報仇,有人為保江湖地位,有人為阻止仇家,有人為救老豆,海上相遇爭奪海神的聖物,就是跟迪士尼動畫《魔海奇緣》差不多套路,小朋友都明白般簡單,不需用腦適合我。
.
每當要延續一個長久賣座系列,技窮之下戰線蔓延至下一代是常識。《奪寶奇兵》如是,《星球大戰》如是,就連曾經大熱的神劇《Prison Break》多年後重臨都要大玩父子血脈,自然主角技能亦得到傳承。肥皂劇劇情,一來方便新人入屋又增加新鮮感,二來慢慢讓舊角退隱江湖減少過份依賴幾位演員。明顯《惡靈啟航》僅屬於過渡性質,睇完片尾目的易明,下集再度加入經典奸角八爪魚鬼船長繼續打來打去,一家四口加埋Jack Sparrow仲熱鬧過馬戲團。臨尾揭曉的一條父女線其實對於我來說充滿驚喜,鋪排未算刻意,沒有故意轉移觀眾視線去找尋線索,是這部電影安排上最成功的地方。不過我真係無擔心過布沙船長安危,他復活有前科了...
《惡靈啟航》被劣評大致歸咎於重重複複欠深度,講真又真係缺乏智慧解難的情節,尤其Sparrow每次都係走負碌路線臨死自然有人救。再講白一點,就係今集可以話佢係毫無貢獻嘅廢柴,除了用來被追殺及拿出兩樣法寶外,真係似負累多過發揮主角應有本事。不過算啦,《魔盜王》無Sparrow出來表演雜耍就不再是《魔盜王》。劇情其實再沒有深入探討空間,反而好好享受視覺同海盜時代的樂趣還好。海戰基本上都一式一樣,局限於帆船內沒有過多花樣可以玩(除非下集變鐵達尼...),反而陸地上多次出現的處死環節就真係歡樂處處。影視作品上古代海盜背景的故事真係無多(請不要計算TVB的《張保仔》XD),亦無一部可以比得上《魔盜王》般連結航海時代天文歷史水底水面魔幻寶物詛咒元素於一身,仍然好享受當中的美術風格及設計突出的造型,現實得來亦加入無限想像和熱鬧氣氛,每隔幾年看一部見慣見熟的系列新作還可接受。
.
75分
文:Nj
.
×追蹤instagram【 madman.movie 】,有你著數!
*讚好專頁【 電影狂人-影評情報交流平台 】緊貼最新電影資訊!***
------------------
░電影資訊 ░獨家影評 ░幕後製作 ░戲院優惠
Fb專頁【 電影狂人-影評情報交流平台 】
http://www.fb.com/MovieMadMan

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→