【#Nj評《今晚打喪屍》】小平反:唔係要大讚,但冇你哋講到咁垃圾!


我唔鍾意每逢港產片本土片就話要大讚,但都希望盡量入場支持製作團隊努力,好唔好睇係另一回事。港產光環從來對我來說都不存在,但我承認會基於資源上輸蝕酌量將要求降低。《今晚打喪屍》的網上討論激烈,極多負評,留下大量『爛片!』『垃圾!』『唔知拍乜!』『你識睇條毛!』。入場前大概有定心理準備,將會看到一部浪費時間的電影。結果又無想像中咁爛喎,點都好睇過《變形金剛5》先啦!當然勝過這部已被世人唾棄的機械人片唔值得慶賀,《今晚打喪屍》亦未去到好好睇級別,但其實未算好差啫。我經常會話,每部電影都有佢有價值的地方,所以《變形金剛5》我夠膽仍俾40分"高分"。《今晚打喪屍》如是,我在看電影過程當中搵到趣味,係好多粗疏位,但不至於是『垃圾』。
.
細心睇網友的留言,爭議點通常在於『Cult唔Cult』,他們覺得『唔夠Cult』。我就真係唔想去扮嘢界定點為之Cult,Cult都可以有大Cult小Cult,你的Cult可以係要求要有昆頓塔倫天奴式噴血、爆頭、斷手斷腳或者用二百種土炮武器一個打一千個極瘋狂敵人,我的Cult又可以係如《今晚打喪屍》唔連戲、非現實、亂咁叫、荷包蛋、暴力侍候臭屁孩。警匪片,愛情片,奇幻片,溫情片,歷史片,都好易下定義,唯獨Cult片講來無意思,你隨便找一堆公認Cult片的電影例子都會發覺幾難搵到統一形容詞,既然都唔知點歸類就話佢Cult算啦。Cult片世界參差,喜歡這些另類電影的觀眾都未必很多部滿意,何況一般睇慣商業類型片的大眾?個個都睇法咁一致接受就根本唔叫Cult,可以直接叫爽片算了。有人話『唔夠Cult』同時,亦有人話包裝得商業但出來效果係『唔夠商業』。有時真係唔知點搞,搵齊絕對夠商業的演員,想去盡商業就不能太Cult,唔係個個年齡層都啱睇,想去盡極Cult又難商業化。當然世事無絕對,但難度高到荷里活都不是時常駕馭得到。現在半商業半Cult,純被商業吸引的群眾難以接受Cult片不合理處,喜歡Cult片者又覺唔夠喉,兩頭唔到岸認真濕滯。
『喪屍片』類型又係有好多種,可以係《生化危機》純特技無劇情,又可以係近年好興的末世情懷,危機中顯露人性光輝,各有擁躉。個人來說冇話特別覺得哪一種先叫好,不要求《今晚打喪屍》要帶到幾多訊息給觀眾才算合格。整體文戲比想像中多很多,"喪屍圍城"都只是背景,都在預告及MV看過大部份屍殺場面。劇情的確枝節很多,多到忘記主線沒有作好收結。但副線個人來說甚欣賞,每段其實都只是很瑣碎,出場不太多但表現效果到位。好多電影用足超過一個鐘去描寫兩個人之間如何相處再加催淚音樂去突顯友情可貴,但信息量亦止於此效益極低。《今晚打喪屍》是剪接出問題及拍攝技巧未到家,還未到劇本大錯。首先要接受一個事實,這部電影不是追逐求生類型喪屍片,而是喪屍背景下把一班人困在一起面對自己及家人的一個故事。
.
拍起來瑣碎的支線其實本身都做到有效連結,不是全部都突然間情感大爆發。龍讓兩兄弟之間感情最不用多說,他們特有的遊戲鼓勵方式一早鋪排,戲裏戲外都感受到當中默契火花。外賣仔不同時間只出場三次以為只屬過場人物,但最後戰勝血內惡魔保衛愛人比萬梓良對吳家麗恩情更深刻。他與跑上粵劇社避難的大哥亦是被已出現多次的"地產經紀"咬,黑超帶帽惡形惡相的大哥打電話俾阿媽講幾句遺言都好動人。被拋棄的王敏奕讓白只親口講出不能放棄的電影主題,間接鼓勵他面對結局心魔,同時剛巧婚紗打扮促使修補好關係的萬梓良了結心願放手一搏。雖則結構上看出鋪排,但拍出來剪在一起效果始終東一忽西一忽,追逐場面亦欠緊張,技巧明顯未夠成熟,還有大量不解情節。怪雞從哪裡來係唔係真正存在?顏卓靈部負能量儀點解掛在喪屍身上?中途佢去咗邊?個組織係咩來?點解萬梓良被喪屍咬完可以安全走人?點解佢爆頭都仲郁到?點解通街喪屍啦啦隊仲可以跑來跑去無事?不過話明係Cult片,我就唔用合情合理去了解都可以接受,I don't really care。
相信電影裡面係有好多現今社會暗喻,但我都係唔想胡亂猜測抒情,為電影添加連導演編劇都無諗過的額外意義。有暗喻又好無暗喻又好,都不影響這部電影帶來的過癮及新鮮感。好多時我們怪香港電影題材狹窄,近年有多嘗試拍攝反映現實每每悲劇行頭的劇情片,青春正能量片亦再次抬頭但水準參差不齊。現在眼前的《今晚打喪屍》走另類路線,雖然未拍得很好使個個喜歡,但我敢講絕對睇到心思。講多一次,唔係話有心思就等於要支持,但肯定並非一文不值簡單『爛片』兩字就足夠形容。戲中六位要角讓人感覺討好,只是可惜顏卓靈跟王敏奕兩位戲份偏少,但接近所有角色都有很好表現,選角安排都是製作組的功勞。在服裝特技動畫化妝道具方面更可以話走上最raw最前線,但團隊需要在說故事方面再下苦功才能成功進入市場,好期待續集有機會開拍。
.
75分
文: Nj
.
*追蹤instagram【 madman.movie 】有你著數!
*讚好專頁【 電影狂人-影評情報交流平台 】緊貼最新電影資訊!***
------------------
░電影資訊 ░獨家影評 ░幕後製作 ░戲院優惠
Fb專頁【 電影狂人-影評情報交流平台
http://www.fb.com/MovieMadMan

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • 哲熙
    哲熙 於 04/07/2017 評論 NO. 1

    變左花瓶 🙄🙄

  • Jerry Kong
    Jerry Kong 於 04/07/2017 評論 NO. 2

    成套戲幾好笑,「潮潮」對白好正👍係差在最尾係個位到啫⋯⋯

  • Fung Kimi
    Fung Kimi 於 04/07/2017 評論 NO. 3

    變形5得20分,e套35分,生化6就60分,狂野8就70分,神奇就90分

  • Aaron Lai
    Aaron Lai 於 04/07/2017 評論 NO. 4

    一直到覺得還好
    直到珊姐爆頭
    我就唔知睇緊咩

  • CF Sun
    CF Sun 於 05/07/2017 評論 NO. 5

    在港產片又非文藝戲,已經大制作,做得好好,張繼聰非常賣力👍🏽

  • TszChung Wong
    TszChung Wong 於 05/07/2017 評論 NO. 6

    爭咩!溝埋一齊咪又係爛片一套

  • C MT Penny
    C MT Penny 於 05/07/2017 評論 NO. 7

    真係差,用動畫嚟做交代,其實套電影要講遇事唔放棄,但用喪屍做主題,的確係好差同簿弱,完全唔夾。

  • K HT Arthur
    K HT Arthur 於 05/07/2017 評論 NO. 8

    买了明天T5的票

  • Pinky Chan
    Pinky Chan 於 06/07/2017 評論 NO. 9

    套戲所有演員都做得好落力想做好套戲,可惜故事真係好爛。

快捷鍵:←
快捷鍵:→