# 評 #《變種特攻:天啟滅世戰》


X-men電影一向係與眾不同,稍為平凡,就好易引人劣評。
以前X-men講到種族歧視問題同性戀問題,你發現好高層次又好貼身,享受一輪打鬥畫面之餘又好似有嘢落袋,非常之咁有親切感。無限量劣評的第三集《變種特攻:兩極爭霸(The Last Stand)》我睇嘅時候仲細,果時覺得好好睇,之後發現只係popcorn movie一套。今集有個位好好笑,幾個年輕變種人好開心組隊去睇《星球大戰:武士復仇(Return of the Jedi)》,睇完戲討論劇情就話通常系列電影第三集都係爛片,弦外之音寸緊導演自己無分參與嘅《兩極爭霸》廢,點知唔小心咀咒埋前傳系列第三集亦都姐係
本集《天啟滅世戰》。都係果句,其實呢集係比較平凡,達唔到我哋一向對X-men品牌期望,話係爛片?又唔係嘅其實,只係比前兩集弱。

X-men電影有趣地方係未必靠打大佬形式去收結,可以係說服領悟或者真係道不同不相為謀,向著同一理想嘅大愛左膠X教授同勇武派磁力王分道揚鑣各自尋找變種人生存出路。問題就嚟喇,天啟幾千年前已經要統治地球難得訓醒覺仲唔做大茶飯咩,吹到自己幾萬次轉世(#虛數要講明)有幾萬種能力,點知嚟嚟去去都係細路仔玩泥沙,係真係主要控制泥控制沙...最後就淪為一場無深度嘅戰鬥,每個角色出自己超必射向中間大魔王,最後再來一個靈鳥火鳳凰無雙,搞掂。呢種打大佬方式已經睇到好厭喇,廿年前卡通片電影開始全部都係咁,我緊張唔起。天啟無乜道理要講,總之佢要統治世界,Everything they've built will fall,係咁意透露下適者生存再創造一個新世界,點夠之前X教授同磁力王之間感情衝突咁有戲劇性呀。當一個故事吹到太大就好難收科,玩到世界末日地球毀滅就已經走火入魔淪為低層次圍打屬意料之內。天啟有乜勁?唔知,玩泥沙外仲有做大聲公對講機,如果佢咁想做耶和華不如去幫X教授做人肉Cerebro連結其他變種人,或者嚟香港幫手起大白象用少啲無謂錢咪全球人類當你神咁拜。佢要做到個樣好奸好勁,但係無壓場感,見佢係條街到行以為cosplay差啲笑咗出嚟。大戰之中有個位我以為有生機,X教授諗到逆向反入侵天啟個腦,同佢心理空間大戰好X-men feel,N次元空間我唔理你玩到飛天遁地火山爆發都可以都無所謂,起碼俾佢哋多啲靈交唔係純極正極邪對打大爆炸就算。

今次兩邊陣營X-men一方其實描寫上都唔錯,靈鳥同鐳射眼相遇萌芽,鐳射眼阿哥同之前亦有所連結,快銀繼續玩玩下輕鬆搞笑,妖后經過多次重大事件變得成熟漸變成人生教練,X教授做好愛心大使享受烏托邦生活,《異能第一戰》裡面嘅新世代變種人都已經獨當一面。但係天啟一方,實在太冇說服力。如頭先多講,天啟實在講唔出咩大道理,唔似得以前磁力王用錯方法做好事值得同情。而磁力王身上前段故事幾精彩感人,短短10分鐘已經觸動情感,起碼明佢點解選擇放棄做好人加入文明清洗,只係最後個個都話唔明佢做乜無啦啦轉軚,解釋得唔足夠唔合理。暴風女神偶像係妖后呢個設定幾好呀,所以最後轉軚都理解到,只係唔知佢做乜一開始要加入天啟...咁啱天啟救咗佢同埋係佢同區遇到第一個變種人就係fd?天使...er...嚴重描寫不足無頭無尾,最後仲好似死咗,純粹因為天啟醫返好隻燒雞翼就肯幫手?最後一個Physloc,究竟佢想點,比天使更冇故事性,最後影佢嬲嬲地走咗姐係下集又出嚟打啦唔使講...btw,佢跟足原著着泳衣又幾正,你知啦埃及好熱。總結係,天啟連埋四騎士,五個人加埋嘅團隊冇乜深度冇乜理想,又背叛又牆頭草唔知做乜。

講到好似好差,又唔係嘅,作為承先啟後做得都唔錯。就好似《星球大戰:願力覺醒》咁,表面睇落又係玩返同一打死星招數,但其實係透過件事介紹新人物出場多加背景性格描寫。新一代嘅變種人加入,頭先講咗,呢條線描寫唔錯有花心思。演員真人嚟講,靈鳥20歲,雷射眼19歲,暴風24歲,黑丑19歲,又有排打,藍獸妖后教授到時咪橋埋雙手做吓教練指導下客串下,拍多三集六集《X-force》《New Mutants》冇問題啦。仲有個角色,好浪費,Jubilee,着住咁sharp醒嘅黃色衫,竟然乜能力都無出過,只好期待下一次。

文:Nj
--------------
░電影資訊 ░獨家影評 ░幕後製作 ░戲院優惠
Fb專頁【 電影狂人-影評情報交流平台 】
http://www.fb.com/MovieMadMan
▲歡迎影評投稿-分享交流!
--------------

如果喜歡我們的文章,請即分享到︰

標籤: 變種特攻  天啟滅世戰  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→