# 評 #《美國隊長3：英雄內戰》 精選

《美國隊長3:英雄內戰》係高手示範作品。
我可以第一句就好大聲講，呢套戲不得了。利申，我絕對唔係漫畫fans，更唔係Marvel fans，我上年同時間曾經大力狂踩《復仇者聯盟2》疲態盡現，認為大堆頭英雄角色電影已經無可能再拍得好。到今次，換上好評如潮嘅《美國隊長2》導演兄弟令我改觀，繼續話俾觀眾聽文戲武戲佢哋一樣可以駕馭得好準確。動作場面無論隻揪追逐定大混戰我諗無人會覺得唔精彩，我覺得最難能可貴係故事文戲角色衝突起因過程全部都好有鋪排次序唔係求其搵個理由開打就算。

動作打鬥唔使我多講，而家只想認真講講《美國隊長3》嘅文戲，太精彩。我永遠覺得故事比任何嘢重要，諗到好劇情都要表達得好俾觀眾接收先得
，淨係得片段而無連接結構都冇用。《美國隊長3》嘅故事結構好有層次，打交衝突原因一層一層咁去。一開始有法案而開始歸邊，但其實個源頭又唔係真係只得法案，係陷害Bucky個局令到之前簽咗法案嘅隊友要做走狗捉人，另一邊TeamCap就為自由為朋友幫佢走佬消除更大威脅而反抗。法案只係迫到簽名嘅一方要履行承諾，而唔係真係兩隊爭拗位，我相信如果成套戲單一呢個位嘈來嘈去一定悶死又無足夠劇情支撐。層次之後又進化，TeamIronman一方唯一有思想嘅兩位－黑寡婦＆Ironman態度有轉變，黑寡婦都覺得為咗政府輸咗個家好無謂，Ironman又發現政府亂咁嚟，兩個人仍然有保留自己意識做返應份嘅事。Ironman信隊長但發現Bucky對佢父母做嘅嘢，又進入另一層次，殺母心頭之恨開打合情合理。雖然成套戲互打好幾轉，但你好清晰睇到唔係為打而打，我最欣賞當中開打由幾個唔同原因組成，唔係獨立講法案/陷害/報仇，而係環環緊扣對每個成員點解歸邊都描寫得好合理。
角色亦都唔係單一取態，頭先講到黑寡婦同Ironman內心有掙扎，其他角色如是。幻視雖然想溝女但要睇佢主人Ironman頭軟禁紅女巫，紅女巫被逼反抗一路喊一路打佢落十八層地獄睇到我都想喊出嚟。Ironman口口聲聲話簽法案係想好似慈母咁要保護大家，點知最後隊長都唔小心爆咗句隱瞞Bucky所作所為都係想保護Ironman。黑豹出場第一句就話其實佢支持獨行獨斷但為國家子民無辦法，但之後佢又加入TeamIronman，而原因係報父仇而不同於其他隊友遵守法案咁簡單。多角色與複雜嘅取態安排得妥當，係電影精彩之處。

好多劇情細節諗番其實好正好有趣，例如：一開頭Stark新品發布會，短短幾分鐘就介紹Tony於電影第一次出場，虛擬投影片段連結整套電影最後秘密，獎學金於探訪spiderman時再次提及，Tony與女朋友之間出現問題及遇見受害者家屬引致隨後取態。隊長前女友Peggy Carter葬禮導出隊長對於冰封醒來仲見到自己認識嘅人係幾咁重要，Agent13嘅講話加強隊長對自己自由取態嘅堅持。幻視與紅女巫幾場戲份就透露之間曖昧，能力來自同一晶石，因軟禁而有衝突，最正係幻視之後誤中War Machine就係因為發射黃光前因溝女而分心！蜘蛛俠可以話係最無思想主見嘅角色，佢太細個淨係聽人講就幫手，自己去到戰場都唔知要做乜，可能如果隊長走去搵佢先佢應該都會加入。
認真打交之間，加入好多搞笑位，係真係好好笑個種，我覺得添加適當趣味係有需要。除咗幻視，隊長都會無啦啦溝女，仲係自己前女友世姪女，兩位老友見到都好安慰。蟻俠變大之後一個大頭影佢好滿足大笑5秒真係笑死，仲有好多屬於蟻俠嘅笑位，貫徹上年上映嘅蟻俠獨立電影風格。
有冇嘢要彈？有，就係Zemo陰謀明明一直都鋪排得好好，點知最後佢話只想幫老婆仔女報仇....我好期待Zemo有一番作為，估唔到搞咁多嘢只係引晒佢哋去播片，最後仲想自殺。我寧願佢真係想釋放5個強化戰士出嚟，合理得多因為大家都知Hydra嘅邪惡。不過算啦，呢度影響唔到我對呢套戲大部份嘅滿意程度，只是有感美中不足。應該，Zemo終有一日會強化歸來，以經典形象示人，發揮更聰明政治陰謀一面。電影後續為黑豹舖路，我好喜歡呢個角色因為今次首次出場只係用好少篇幅已經講清楚佢背景為人。最後Bucky被冰封於黑豹國家，隊長預料敵人會搵到嚟，唔洗估，黑豹電影會有今次被捧上神枱型到冧死妹妹仔嘅Bucky加盟，一齊打，吸引力大增。實在太精彩，見到人哋好評下好高期望入去睇都覺得正，無得唔俾85分。

文：Nj

××××××××××××××××××××××
《復仇者聯盟2》我點睇？
https://www.facebook.com/njintomovies/photos/a.812939712100572.1073741829.810079502386593/899479040113305/?type=3&theater
－－－－－－－－－－－－－－
░電影資訊 ░獨家影評 ░幕後製作 ░戲院優惠
Fb專頁【 電影狂人-影評情報交流平台 】
http://www.fb.com/MovieMadMan
▲歡迎影評投稿－分享交流！
－－－－－－－－－－－－－－