# 評 #《下女誘罪》

◼︎◼︎朴贊郁導演，實在唔敢評，尤其上網睇過很多望落非常有深度的觀後感。我普通廢觀眾一個，自問唔識睇太多隱藏意思，即時睇完人分析都唔明。基本上點評都係死，容許得罪講一句，雖然我覺得都幾好睇，不過又未去到超驚喜錯過一定後悔的程度。
◼︎◼︎當中戲服場景製作最令人深刻，很多畫面都靚得令人深刻。故事其實都很難說是太意想不到，的確有至少兩個大轉折位，不過相信觀眾其實都會有備而來時刻於劇情中找線索，結果不難估到。故事分三節，
頭一部份節奏快，但因不能透露解謎劇情而顯得有點跳躍破碎，雖然後來有解釋補圓，但如果整部電影步伐一致更佳。

◼︎◼︎電影第二賣點是色慾情節，見識少的我大開眼界，女女床上戲目不暇給，可以話學到唔少嘢。如上文所提及，色慾畫面場景動作都是很美的，對劇情亦有意義沒有過份添加。發現同場觀眾女性似乎比男性更多，有沒有什麼啟示？
◼︎◼︎劇情就好簡單，來來去去幾個人物沒什麼複雜，你呃我我呃你最後唔知邊個呃邊個。雖然大師作品，又帶點嚴肅黑暗，不過唔使驚會悶兩個半鐘好快過。真係唔識對電影語言觀察得太細緻，只懂當一齣逃亡愛情故事來看。可能我真係太膚淺浪費了大師心意，不過自己看到電影結構完整講得通，就收貨了。

文：Nj
－－－－－－－－－－－－－－
░電影資訊 ░獨家影評 ░幕後製作 ░戲院優惠
Fb專頁【 電影狂人-影評情報交流平台 】
http://www.fb.com/MovieMadMan
▲歡迎影評投稿－分享交流！－－－－－－－－－－－－－－