【〈復仇者聯盟4：終局之戰〉初步劇透討論】仲好睇過神作《美國隊長3：英雄內戰》！！

1. Avengers 四集來講最好睇係呢一集，甚至本來整個MCU我認為拍得最好的Civil War，正式宣布地位不保。A4 > A1 > A3 > A2
.
2. 今次結構清晰明確，分三部分：
a. 失落解散再重聚，b. 做任務試圖逆轉，c. 終極一戰
先講a，雖然係幾長篇嘅文戲其實都唔悶，始終剩低嗰啲人物有返咁上下背景同互相嘅關係，有劇力絕對係觀眾想知嘅故事部分。重聚類似Avengers1的集結過程，逐個登門拜訪聽故仔說服，係我喜歡A1的元素。
.
再講b，這部分異常有趣，分隊進行時空旅行"借"寶石。
途中重返多個MCU十年來的重要場景，有補完作用，亦有劇情作用，更有人物內心甦醒自省作用。絕對是Marvel送給fans多年支持的禮物，熟悉之上加多重驚喜笑料再推進劇情，編劇之高手示範。.
最後講c，大戰無得輸。個人經常吐槽上集大戰真係慳水慳力，原來導演收埋最好的在最後。先三巨頭vs滅霸，見到雷神雙武器都知乜事，去到隊長接手屌打滅霸一輪嗰刻真係依然爽到唔識講。然後唔夠打，隊長一夫當關站起來想繼續打個畫面，又係型到爆裂。再之後多個魔法黑洞出現成千人走出來，打到魔戒咁痴線差啲唔記得咗呢度係地球。嗰種熱血感，淨係呢半小時都值回票價。仲有有個位超搞笑，女權隊長做最後任務之前，成班女英雄無啦啦唔知邊度跑晒出嚟話保護佢！其實好想鬧，但係又真係幾型幾有feel搞到我都係收皮吧啦！總之，最後大戰真係精彩到爆，值得睇多兩次睇清楚，始終太快太多人。
.
3. 頭先講到驚喜的場景，少不了驚喜的演員回歸。昨日首映有Natalie Portman到場，大家都估會唔會... 真係！影后仍然唔介意短短短短暫回歸MCU。仲有古一法師惠英紅，小紅姐上星期拎完金像獎又有新戲啦～今次佢嘅出現更加確立Dr. Strange的地位，更顯手足之間信任其實幾感動。.
4. 其實Ironman死我反而無乜太大感覺，似乎唔使估都知，唔算拍得催淚定點。反而佢最後一句"I am Ironman"先係精警，打冷震位，有始有終，係fans就明，所以都話呢套戲絕對拍俾fans睇。而隊長退場安排得極級恰當，舒服，唔使死，結婚，過到正常人生活，交棒，完結無止境的戰鬥。
.
5. 回到聖域初頭見到Loki訓係度，同場有啲女喺度尖叫。
.
6. 升降機準備打一幕非常聰明，更加融入上年討論得好勁的九頭蛇隊長漫畫內容。
.
7. 黑寡婦死，我唔算特別喜歡這個角色，不過感受深過ironman死，悲壯一點吧。其實我認為應該是黑寡婦加變形俠醫去拎靈魂寶石，反正變形俠醫返2014紐約完全無用，搵個異能人去外太空點都正常過鷹眼，而變形俠醫睇住黑寡婦死一定更加慘。.
8. 未睇嘅朋友問我雷神有冇新衫。。。我話都有新造型 lol
我鍾意佢今次咁，相信都會有正反意見，但我真係鍾意，有故事有戲可演，又幾搞笑，又順便弱化佢殺滅霸都冇咁易，設定上係有危機但成功嘅嘗試！
.
*追蹤instagram【 madman.movie 】有你著數！
*// https://www.instagram.com/madman.movie/ //
*
*讚好專頁【 電影狂人-影評情報交流平台 】緊貼最新電影資訊！***
－－－－－－－－－－－－－－－－－－
░電影資訊 ░獨家影評 ░幕後製作 ░戲院優惠
Fb專頁【 電影狂人-影評情報交流平台 】
http://www.fb.com/MovieMadMan