×劇評×【《行屍》The Walking Dead】第8季第1集


估唔到早兩日隨意講開The Walking Dead收視下跌嘅消息,引來咁多美劇同好加入討論。到今日我就打算講下睇完The Walking Dead第8季第1集,我究竟有幾失望。

上一季在扑爆主角頭後開始直插谷底,不停講佢地好down好無助好慘,好啦叫做終於振作,點知最後又俾班垃圾佬跣鑊金,結果就在唔知進展過啲咩嘅情況下完結。

都算,等咁耐理論上今集應該真係開波喇喎… 係呀,領袖們例牌發表動人演說完畢後出發直踩敵陣,去到見到條仆街Negan走出嚟無遮無擋竟然仲同佢慢慢傾計,Rick唔出手Maggie都忍唔住啦下話?之後Gregory出黎玩心理戰,失敗咗竟然好漫畫式咁一腳伸佢落樓梯… 笑死我!大佬好老土呀呢啲奸人行為,直頭要係佢頭上面鑿住『我是壞人』四個大字,按情理咁冷血班人見佢無利用價値就直接爆佢頭養少個人,至少觀眾可以過下癮啦。原來咁反常理嘅行為係伏線嚟既,以為個神父終於做返個男子漢,點知又婦人之仁走去救Gregory又"唔小心"令自己身陷險境,究竟係邊個諗埋呢啲唔合情理揾戲做拖劇情嘅橋段…

上季完結,劇組派人出來叫大家放心,話今季會好緊湊... 但暫時嚟睇我淨係睇到一啲強行製造出來嘅緊湊,我淨係怪班角色做乜咁蠢咁低能,完全無為佢哋緊張過... 今集好似好多爆破呀... 但係全部都係開槍射空氣,子彈好似無限咁多,敵人就唔見有損傷... 我睇唔透。講到好似好有計謀,咪又係引啲喪屍去敵人度,以前出現過好多次唔使講足半集嘅。要數到以前令人心跳加速嘅大戰,有Governor大破監獄,再勁啲就係阿婆一個人打爆Terminus,經典經典。

今集咁扮嘢,擺明就係留一手,之後一定有更勁嘅衝突。睇下又開始出現啲失落表情大特寫,又有啲夢境定天堂畫面,又想留"伏線"叫你追落去就知會有咩大事發生。不過唔好意思,我淨係覺得加呢啲落去好奇怪,令到首集欠缺完整,吸引唔到我。講咁多,我下集都係會繼續睇...

*讚好專頁【 電影狂人-影評情報交流平台​ 】緊貼最新電影資訊!***
------------------
░電影資訊 ░獨家影評 ░幕後製作 ░戲院優惠
Fb專頁【 電影狂人-影評情報交流平台 】
http://www.fb.com/MovieMadMan
.
*追蹤instagram【 madman.movie 】有你著數!
*// https://www.instagram.com/madman.movie/ //

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→