埃及大金字塔新理論：原來是宇宙通訊設施？ 精選

埃及吉薩大金字塔嘅真正用途一直係考古學界爭論焦點，最近有伊朗學者提出新理論，指呢座古建築可能係一座「重力燈塔」，用嚟進行星際通訊。

伊朗沙希德·貝赫什提大學嘅賈拉爾·賈法里喺2025年3月發表研究，指出胡夫、卡夫拉同孟卡拉三位法老嘅金字塔，精準咁由西北向東南排成一直線，而大金字塔嘅側面亦完美對齊東西南北四個方向，反映古埃及人對幾何學、天文學同測地學有極高造詣。


賈法里認為，大金字塔嘅地理位置、建築比例同地球自轉嘅配合，令佢有可能成為一種「重力發射器」。佢特別提到，金字塔位於北緯29.979234度，呢個數字同光速（每秒299,792,458米）非常接近，似係刻意安排。佢又提出，地球圍繞太陽公轉會產生類似電波載波嘅週期性重力模式，而金字塔嘅固定位置同地球自轉，會令呢個模式隨時間出現變化，即係「調變」，從而將金字塔變成宇宙訊號編碼器。


雖然呢個理論唔係全新概念，過往已有另類考古學家主張金字塔係用嚟同外星文明溝通嘅設施，但賈法里嘅研究從重力波計算角度分析，認為三座金字塔形成高度有序嘅模式。佢承認呢個想法目前仍屬推測，需要進一步驗證。值得一提嘅係，早前亦有研究指大金字塔地底可能存在地下城市，究竟同呢個宇宙通訊設施說有冇關連，就要等日後更多研究揭曉。