美國博物館展出7,600萬年前巨鱷完整骨骼！重現「恐龍殺手」真面目

美國佐治亞州嘅特魯斯科學博物館，近日展出一副極具震撼力嘅巨型鱷魚全身骨骼複製品。呢副屬於「迪諾蘇斯·舒維梅利」（Deinosuchus schwimmeri）嘅標本，係一種約7,600萬年前白堊紀晚期活躍於北美嘅巨大鱷形類動物，體長估計達8至10米，部分個體甚至可能更大，被認為係史上最大型同最危險嘅爬蟲類之一，連恐龍都係佢嘅獵物，因而有「恐龍殺手」之稱。


呢副複製品並非來自單一完整化石，而係古生物學家大衛·舒維梅博士花咗超過40年時間，喺美國東部多個地點發掘收集嘅多個化石標本，再經由專注製作博物館級化石複製品嘅特里博爾德古生物學公司，利用高解像度3D掃描技術整合數據，重新構建出科學上精準嘅全身骨架。整個製作過程歷時兩年，最終成品反映出最新嘅解剖學研究成果。



博物館教育部長漢娜艾斯拉指出，每年有成千上萬學生到訪，呢副複製品有助佢哋更深入了解白堊紀時期當地生態系統。策展協調員麗貝卡·梅爾斯海默就話，特魯斯博物館係目前唯一擁有迪諾蘇斯·舒維梅利複製品嘅博物館，親眼目睹呢副長約9米嘅骨架，遠比文字描述更具衝擊力。舒維梅博士則強調，研究呢啲古代頂級捕食者，能夠幫助我哋了解生命點樣喺變化環境中適應同取得優勢。