降兩度化身文化保育軒 細數張敬軒歷代之作

榮升為餐廳老闆既軒仔 (張敬軒), 日前親自籌備既Junon (仙后餐廳) 終於喺灣仔開幕。餐廳主打法國菜, 裝潢佈局仿照60年代本地首間既旋轉餐廳, 華麗優雅既氣派令人嘆為觀止。餐廳結合音樂同餐飲兩元素, 客人可親身欣賞每晚特意籌備既音樂表演。場地仲有唔少古典玩意, 部份好似係主人家軒仔既, 歡迎客人欣賞或購置。



資料來源: 張敬軒 Facebook, HK01

軒仔上年度沒出新歌, 原因係佢花唔小時間準備呢個計劃; 小至廁所毛巾既擺法、餐單既設計, 大至場地既佈局, 軒仔都要一手包辦。作為專業歌手既軒仔, 居然可以一手一腳主理一間高級餐廳, 少一啲既藝術修養、創作靈感以至耐性都唔得。但最重要既, 無疑係對興趣既熱誠同了解; 軒仔熱衷歷史, 近年既事業都涉及唔少有關文化保育既項目。除仙后餐廳, 推出以福利別墅Felix Villas (緋荔榭) 為主題既專輯《Felix》亦可見一斑。軒仔除左有一份使命感, 係本地樂壇既中樓底柱, 不時提拔新晉歌手; 佢仲充份利用自身既身份, 希望自己既作品同成果喚起聽眾對社會議題以至城市發展既關注。以下既作品, 相信軒迷應該會耳熟能詳:


過客別墅

前年軒仔遷出Felix Villas (福利別墅緋荔榭, 香港三級歷史建築), 亦特意搵番作曲人Vincent Chow, 希望作一首可以表述舊居情感既作品。呢首歌希望通過淒美而帶優雅既感覺, 去紀念軒仔既舊居, 所以編曲方面都落左唔少功夫, 以營造懷舊優雅既感覺。

Felix Villas 環境 (找對的人MV)

Apostrophe' - 張敬軒 Felix Villas 訪問(Lifecycle)

緋荔榭.少年

同為專輯《Felix》既派台作, 講述軒仔與felix心靈相通, 深情既演繹以至歌曲既佈局氛圍, 整體上為之優雅且不落俗套。


石徑

廣東大碟《No. Eleven》既作品, 由John Laudon作曲, 周博賢填詞。當年高鐵上馬, 唔少具鄉土情懷既村落被迫移除, 例子有位於錦田既菜園村。如今人去留空, 只得空洞既高鐵建設以至廢車廢鐵場, 呢首作品可以話係時代既見證。


資料來源: 蘋果日報


怎麼可

同為專輯《No. Eleven》既作品, 以一隻原受主人寵愛, 後被遺棄既小狗為題, 希望令聽眾反思點善待自己既寵物。


櫻花樹下
軒仔既首本名曲, 歌詞亦包括本土既元素, 好似係「如有天置地門外 乘電車跨過大海」, 當中既比喻或者係指: 搭電車跨越維港有冇可能呢? 將來覓地填海, 填滿維港, 電車線因而伸延至九龍半島? 抑或係回到殖民地時期, 接受高架大橋既興建方案以連接維港? 無論點去詮釋, 呢個比喻已經被理解為「不可能」, 歌詞中既一方已經無可能同心儀既佢喺埋一齊。

引用【社區異想】香港曾擬建維港跨海大橋 海底隧道如何「打贏」?
https://www.hk01.com/sns/article/131959

資料來源: 香港01

感情用事

07年廣東大碟《酷愛》, 《感情用事》係一首高質素既sidetrack (非主打派台作)。據作曲人C.Y. Kong提到, 軒仔以呢首作品向Danny陳百強致敬, 所以演繹既唱腔比較老式, 以配合用意。而歌詞雖然都係情情塔塔既題材, 但都有唔少有關城市議題既比喻, 好似「面對爭執 動盪暴亂只有愛可保證」, 帶出喺市民同當權者既衝突同矛盾下 (喺保育議題上), 只有愛可以得以保證同確立。「當古蹟消逝亦無聲 難留住的天星 只得戀愛保證」, 當年天星碼頭既清拆, 喚醒唔少市民對保育議題既關注, 態度亦由事不關己轉為熱衷參與。呢個時期算係分水嶺, 近年喺推土機式既功利社會下, 即使有唔少關注人士, 但部份古物古蹟仍被移除。慶幸既係, 有小部份由民間同福利團體籌備既保育項目得以持續, 例如位於灣仔石水渠街既藍屋建築群。而呢首作品, 間接劃下一個時代既記錄, 社會態度既轉變。


資料來源: 蘋果日報


公園前

作為R&B曲風《孤單公園》既特別版, 《公園前》由因葵填詞, 張敬軒作曲。歌詞提到唔少廣州既城市地名, 為都市留下一個記錄, 好似係「黃花崗找不到焦距」、「長堤大道買汽水 海珠區今夜咖啡店」、「越秀早經過 走出天河 怎麼可爭取」等等。朋友番廣州探親, 都會不期然哼起呢首作品。



資料來源: 張敬軒 Facebook & Instagram, Youtube, 新假期, 香港01, 蘋果日報

呢排開設既facebook page「你有你講 我有我講 不如講下香港樂壇呢」, 請多多支持!

https://www.facebook.com/localmusic927/

標籤: 張敬軒  本地樂壇  

留言


請按此登錄後留言。未成為會員? 立即註冊
    快捷鍵:←
    快捷鍵:→