驚？

唔知大家夜晚返屋企時會唔會淆底呢，由其住喺村屋。

我自已就係住喺村屋，雖然附近有大型屋苑，又痴住條高速公路，亦都有幾支街燈。但係我每次夜返屋企，都會有啲淆底（可能係因為怕黑）。早排我同啲同學一齊睇「咒怨」，我一向都唔太鐘意睇鬼片，因為我小學果時唔知因咩事有一個禮拜假，老豆又咁啱放假，咁我就同老豆一齊日日去戲院睇戲，睇到無野好睇就求其搵左圖戲黎睇，果時見咒樂園個poster有隻小丑，年小無知的我仲以為係笑片，佢仲係3D添。咁就中晒伏，嚇到我以後唔敢睇鬼片。
考完公開試，梗係成班同學無無聊聊唔知做乜好，咁就有人提議佢xx屋企睇戲啦。（好平常，相信好多人有ed經驗。）咁睇咩呢？就揀左咒怨。本來睇西片果套咒怨既。好衰唔衰，我地剩係down到disc1，disc2，down唔到，咁有人見到日本版down到喎，咁就中晒伏咁睇日本版既咒怨。哇！d氣氛一路都好得人驚，靜鷹鷹，久唔久又整啲怪聲。都算，睇鬼片預左。點知佢又玩埋啲血腥核凸，有睇過既人都知，果隻枷野子由樓梯爬落黎果幕，仲有個女仔個下巴俾人切走左，得返條脷係度揚下揚下，兩隻手斬左一半喺度條條揈，真係核凸到唔知佢想點。

本來我住係啲私人屋苑，姐係隔離左右都叫做城市feel既地方，夜晚黑，街燈又光又多，夜幕低垂都好似日頭咁。就算我夜一夜返屋企都唔洗淆底。但好衰唔衰睇果套野時又搬左屋，搬左去呢家啲村屋。夜媽媽真係嚇死我。
村屋多蚊蟲是常識。我就好鬼憎啲蚊蟲成日飛來飛去，見親都會追住佢地黎拍。屋隔離有堵牆，好多時都勁多烏蠅仔，我試過用電蚊拍係咁追住佢地黎拍，每拍中一隻就會有「啪」一聲，然後你會聞到啲燶味，好鬼爽癮。我又試過買支殺蟲水返黎噴，一噴幾隻幾隻咁跌晒落地，有啲飛得切，避開左，我就追住佢地黎噴，然後佢地就會好似戰機被擊落咁徐徐飄落地面。偶然我沖緊涼都會見到有一兩隻，我會用花灑射佢地，射到佢地迫䧏，然後就浸死左⋯

其實驚一樣野或者事，其實都係驚死姐。如果講驚死，我夜媽媽返屋企預到妖魔鬼怪就算係有怪人喱埋一邊撲出黎斬我，係好唔現身，換轉係啲蚊蟲、烏蠅仔，佢地日光日白都會俾我地啲痴線佬用電蚊拍殺蟲水等唔同既武器追殺，仲要大規模咁大屠殺。應該係佢地仲驚過我地。
by小伙子