《EU超時任務》圍村村長，Signal Wong 真正上位之作？ 精選 推薦

本周一首播的《EU 超時任務》，雖然播出3集幾次槍戰警匪雙方命中率都低得可憐，又被觀眾取笑玩航拍玩慢鏡想扮有電影感但又得啲彈殼變慢而無key 埋啲子彈…不過有朱千雪擔正，又有羅樂林每1、2集就死一次，網民自然9點半坐定定扭開電視機。

而 so far 第2次做男一、做圍村村長的王浩信表現先係最搶鏡，除咗一口圍頭話算過到骨之外（利申本人唔識圍頭話，係有自稱圍村人的網民話OK的），可以嬉皮笑臉、刻意誇張搞笑：

可以卑躬屈膝、唯唯諾諾：

可以認真 mode：

對方一走，立即變臉懶係懸疑亦得：

唔知觀眾覺唔覺，王浩信一身西裝皮鞋襯花裇，加上略為誇張擺明搞笑的演出，幾似《愛我請留言》黃金貴（關禮傑），有份做《愛》的Signal Wong 向佢偷師都唔出奇。
而與朱千雪的鬥嘴，間中幾句以重覆對方對白來反問的方式同腔調有少許《男親女愛》余樂天（黃子華）的味道。而些少似鄭中基的地方並非因為《全力扣殺》講圍頭話，而係第1集在私竇招呼大老細黃柏文、林偉一幕時做小丑自己講自己笑，略有鄭中基《我要做 Model》、《龍咁威》的影子（當然overall 演技爭好遠）。
王浩信2005年出道樂壇，基本上一首 hit 歌都無，得同方皓文合唱的《拖字闕》有些聲氣。轉戰TVB，肯學肯博，終於叫做出到頭。成名作2010年台慶劇《刑警》Carson，示範了就算同樣是「大Sir」所出、高學歷空降警隊、極有正義感的新人，不一定要是蔡思達式的煩膠。

《名媛望族》雖然只是配角，但被嚴父劉松仁摑13巴觀眾實記得，王浩信更自稱被摑到顎骨移位：

《法外風雲》做二世祖，都算夠乞人憎，但同張松枝當然仍有距離；又再被摑，今次到老母謝雪心：
（Wikia 圖片）

拍得TVB當然唔係下下有發揮，拍悶劇、劇膠亦在所難免。好似《東坡家事》真係偏悶之餘，歐陽bobby 回塘帶新人都算，仲要有長腿蚊扯後腿。但王浩信亦拍握到秦少游一角騷肌肉，成功冧掂同公司一眾中女、阿姐俾 like。（微博圖片）
在EU 之後會着底褲孭雪妮姐走佬同孭脹爆苟姑娘上扯，對於一般觀眾嚟講，嘩，爆／搏到呢…

講起悶，當然唔少得《無雙譜》、「愛瑜伽」的監製羅鎮岳，雖然《刀下留人》勉強算洗洗底，嚟緊《八時入席未知會否打回原形；但他出品的悶作甚至離題作《樓奴》確實令王浩信首次擔正男一出師不利。到今次《EU超時任務》，唔理你抄幾多套劇幾多套電影，頭開到咁大，會唔會收唔到尾變膠劇就未知，但按目前表現以及節目巡禮的「劇透」（下片）相信王浩信會有發揮。而暫時另一受力捧小生袁偉豪，暫時幾集真係好有大茄路人 feel，即管睇往後劇情會唔會令佢跑出，定《鐵馬戰車》之後就無以為繼。

比起陳自瑤《公公出宮》食《一蚊鷄保鑣》老本再做乞人憎鐵嘴鷄，佢老公王浩信就戲路愈演愈廣，唔計陳國邦、視帝祥，基本上他與馬國明是TVB 最有可塑性的2個「當家小生」（雖然可能馬明就快唔係）。