TVB 食字角色名

娛樂之王 於 13/04/2016 發表 收藏文章
唔少觀眾、網民曾指無綫劇集《》中的劇中人物角色名玩食字又低能又趕客,例如藍黃紫紅(羅蘭)、賴慰玲飾演的人類學學生丘玲梅(幽靈媒),或者《皆大歡喜》金年(林文龍)、金月(謝天華)、金日(陳彥行)feel 的何年(黃又南)、何月(陳嘉寶),就連等,而鄭嘉穎演的不死人直情叫邢活著(仍活着)。玩食字角色名都係算係TVB 某種核心價值,例如《倩女喜相逢》、《老表,你好Hea!》等,而且好多時用食字角色名反映人物身份/職業,好似以下幾套:


《依家有喜》(2010)
秦沛
角色:外科醫生葛一刀(割一刀)
(tvb.com圖片)


《老公萬歲》(2010)
做得萬歲堂藥廠店員,個名都要係藥名/化學嘢:
(tvb.com 人物關係圖)
李綺虹:繆靈芝(妙靈芝)
郭政鴻:鄺辛訴(抗生素)
梁烈唯:孔爵錫(孔雀石綠)
王君馨:蘇單虹(蘇丹紅)
羅敏莊:盤妮茜(盤尼西林)


《天天天晴》(2010)
劉丹
角色:朱保(珠寶);龍福珠寶鑲石師傅業務顧問
(tvb.com 人物造型照)


《貓屎媽媽》(2013)
曾航生
角色:遊戲商老闆尤器(遊戲)


《愛回家》(2014 )
張繼聰
角色:常健新(常健身);See See Fitness 星級瑜伽導師、總健身教練兼老闆、大股東
(蘋果日報圖片)

《醋娘子》(2014)
梁琤
角色:計素(計數);「一路棧」老闆娘,應該真係要計數。
(tvb.com劇照)

《師奶Madam》(2015)
黃子恆
角色:花花公子邢藍(邢Sir;型男)
(黃子恆國際影迷會微博圖片)

韓馬利[
角色:賈美蓉(假美容);曾偷老公羅帛(李成昌)買樓首期去日本整容。
(明報圖片)


《鬼同你OT》(2015)
(明周圖片)
陳豪
角色:總建築設計師米開朗;玩著名文藝復興建築師、藝術家米開朗基羅(Michelangelo;雖然都有人譯米高安哲羅、米開蘭基羅等)

蔣志光
角色:艾鐵文(IT Man);資訊科技網絡保安總顧問。


《愛情食物鏈》(2015)
C君
角色:刑燁源;真係做竇凌食品的營業員。
(tvb.com劇照)


順手講講《殭》。以上有幾套都係所謂輕鬆趣劇,劇情笑唔出,TVB 用角色諧音去當笑位,觀眾都俾你過(甚至覺得好X好笑)。但今次《殭》,明明睇promo、第1集想sell 型,就無謂整呢啲角色名俾人抽秤啦。(雖然第2集開始都露晒底轉晒tone)除非劇組覺得「仍活着」同「葉常綠」、「花蕊紅」一樣咁「有意境」、「有深度」。

講型,唔少觀眾就笑鄭嘉穎個look 似元華。咁似元華又點先?本人又覺得元華幾型。就算覺得似元華唔型,鄭嘉穎真正食糊/好睇其實係做奸仔(《通天幹探》),或者少許油腔滑調又有點佬味的角色,例如Law 霸或者第2集露晒底的夜吾夜老闆,總之唔係Chok 峯路線(呢套留返俾陳山蔥)。而號稱低成本製作的《我和殭屍有個約會》上咗神枱,明明係MK金毛的尹天照都變型男。

就算話抄,EU 夠係抄,觀眾最終只會在意好唔好睇。而暫時睇咗兩三集,都唔計淫Kay 對大眼仔、唸對白、演技同啲特技,劇情真係偏悶、唔夠力。都唔好話《大時代》秋官掟仔落樓自己唔敢跳、《天地豪情》一開波「撈家」賭錢賭到輸完姚瑩瑩間餐廳着草返香港輸埋郭藹明結婚買樓錢嗰種級數,《殭》連《潮流教主》一開波蔡思達被欽點做潮流教主接班人呢啲勉強叫有啲震撼位、引人入性位都做唔到。變咗俾人話似旅遊特輯,《衝上雲霄》其實都係咁上下,但人哋有馬欖鐘、吳鎮宇做機師嘛。《殭》個頭開壞咗,睇下之後有無改善。

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→