《G-1格鬥會》落幕,有無爛尾?

娛樂之王 於 16/05/2016 發表 收藏文章
ViuTV《G-1格鬥會》最近去到尾聲,前晚星期六(5月14)郭思琳在復活賽3 round 以59-57點數擊敗黎美言晉身決賽。不過繼「阿旦」鄧洢玲及王蘊妮分別因喪父及滑冰世錦賽退出後,臨尾再有鄧穎芝Van仔同郭思琳因傷患面臨退出,而唐紫睿Hazel及製作組就有檔期問題。前晚播出尾2一集直認「爛尾危機」,準決賽唐紫睿對郭思琳一役之前要開會講數:


鄧穎芝驗完傷,加上無法遷就唐紫睿及製作組檔期,唯有退出。昨晚(5月16)播出決賽,郭思琳就算未康復都要頂硬上。負傷上陣的郭思琳頭2 round 被唐紫睿先後使出十字固及三角絞,打到想嘔都未有輕易被降服,第2 round 都總算頂到夠鐘,而且顯示出力量及技術/頭腦有進步;在評判分數方面更勝唐紫睿:

但打完第 2 round 醫生上台檢查後,郭思琳無法打埋第3 round ,領先6分下不敵傷患而投降,唐紫睿成為首季拳后:



至於點解有爛尾疑雲,首先就因為戰績最強(3勝0敗)兼已晉身決賽的鄧穎芝最終無得打。既然思琳都要休養,其實可以唔就唐紫睿,但製作組忽然話3月要起貨,而Van仔 Facebook 就話本來檔期係5、6月直播決賽。咁Hazel 係咪犯咗同王蘊妮一樣嘅錯,定係作為真人騷同製作組玩認真就太天真?
loading


最終唐紫睿做拳后,賽後勝利宣言講自己點樣唔放棄贏到冠軍;但實情應該係其他人因傷退賽?雖然比賽表現都睇到唐紫睿有下苦功亦有技術,打咁多round 都健健康康都係一種實力,但有無觀眾覺替鄧穎芝、郭思琳不值,或者睇唔到鄧穎芝對郭思琳而可惜?


而另一疑似爛尾位在於頒獎位,打餐死先分別得1萬/5千蚊獎金同健身會藉。頒獎的健身會所CEO 原來就係郭思琳教練杜恆霖,喂有無利益衝突呢?真正有意義些少的獎品相信就係片約。陰謀論咁睇,以簽女演員計,8個參賽者中真係首選「晶女郎」唐紫睿。咁當然,騷錢/炒起人氣話題呢啲觀眾唔知。(戴返頭盔先,以上疑似「爛尾疑雲」純屬好奇、疑問,並非嚴肅指控。)


最後,本人心目中冠軍係鄧穎芝,唔知大家點睇?
標籤: G-1格鬥會  ViuTV  Hazel  唐紫睿  鄧穎芝  郭思琳  Vangie  Margie  

留言


請按此登錄後留言。未成為會員? 立即註冊
  • kuen104 於 20/05/2016 評論 NO. 1

    losai

快捷鍵:←
快捷鍵:→