《EU超時任務》大結局;觀眾、網民:「無綫近年佳作」、「好Sad!」

娛樂之王 於 11/04/2016 發表 收藏文章
昨晚《EU超時任務》大結局,Final Boss 其實係阿正(袁偉豪)老豆郭偉誠(潘志文)。渠頭(王浩信)同威爺(豹哥)夾手夾腳收佢皮。阿正飲大兩杯上晒頭,想亂槍掃射渠頭報復,結果阿風(朱千雪)為咗救渠頭就引爆炸彈同阿正一鑊熟。就算阿風會忘記渠頭,最終渠頭為救阿風仍自己穿越,獨力解決販毒、黑警案、補償返Joyce(苟姑娘),甚至做埋阿風嗰份,救埋阿添(黃子恆)老婆等等,皆大歡喜。

以上劇情,與唔少追開的觀眾、網民的推測大同小異。不過到真係播出睇結局,亦唔少觀眾睇得幾投入,尤其是渠頭代阿風收拾阿正的一段錄影獨白(節錄),

以及阿風炸到皮都爛晒都要出盡奶力講多幾句死於渠頭懷中(阿風幫渠頭頂住阿正復仇呢一大段其實幾狗血,但齋講王浩信表現係幾好):

除咗以上2段,到片尾渠頭講返3日經歷的獨白亦有唔少觀眾、網民覺得「好sad」、「抽離唔到」,甚至達哥mode「喊出嚟」
(對白Cap圖王 影片)

亦有觀眾認為睇到大結局最尾先明晚晚何雁詩首洗腦歌意思咁話:

「無需有萬次只需一次愛 未懼流眼淚
留起這初春不需千百季 去看穿秋水
只要伴著你任花火散去 讓背影結聚逾越時空裡 無憾一起飛去」


今次個「開放結局」都算OK啦,雖然可以再簡潔啲,希望唔使好似最近午間劇場翻播的《棟篤神探》咁重拍一個happy ending。咁當然,TVB 本身出預告/每集內容係話「4月3日晚上,鼎名獨坐晨風家門前花園,倒數着時間過去,踏入4月4日凌晨12時,一切都不能再逆轉。鼎名喝着悶酒離開,豈料,奇蹟即將發生……」,阿風玩埋宇宙GEM「回憶的砂漏」吊咀,你當佢happy ending 亦得。

《EU超時任務》有無抄/抄邊套/抄幾多都好,觀眾最終介意的只係好唔好睇。雖然有唔少細位甩漏,中段又略拖、少悶,尤其是水晶梨(譚凱琪)同阿正、阿風老母(呂珊)同周炳仁(黃栢文)2段出軌三角戀;而尾段突然爆兩個鍾永啟(陳志健)、鍾永俊(陳家良)出嚟,觀眾無路捉、太屈機,但唔影響得晒成套劇。

就算話今次大橋的確係OK只係因為(疑似)抄得好,但都要演員演到、配合到。前麗的當紅小生潘志文《以和為貴》之後又中風;羅樂林就死到慣,真係駕輕就熟。本欄在開播頭幾集已經讚過渠頭角色搶、王浩信又落力演,(《EU超時任務》圍村村長,Signal Wong 真正上位之作?)加埋上述大結局幾個重要高潮位,真係由頭帶到尾。而豹哥同朱千雪雖然演技普通,(聞說威爺本來是大隻斌演,真係水鬥水),但角色都算完整。尤其是威爺,開頭估佢作用只係懶係製造下懸疑,臨尾交其交待一兩句算,但原來都有歷程有變化有解脫,主題「珍惜當下」喺呢條線亦貼切,而且做到人辦俾臨尾穿越的渠頭睇(雖然選材(又係絕症)同表達方式太老套,驚死觀眾同老婆唔知豹哥你睇化晒,要講到白晒)。而朱千雪就明明係演一個煩膠,但有鋪排同唔趕客。


今次《EU超時任務》有唔少觀眾覺得同《刀下留人》都係無綫近佳作、甚至「神作」。本人就唔認同係神作,不過覺得EU 好過《刀下留人》,因為至少相對無咁多矯情對白,而且刀下留人都係靠呢啲嚟掩飾一條沉悶的查案線同老套結局(網民質疑「神劇」《刀下留人》結局爛尾?)。而EU 今次玩case 劇,雖然上面講咗節奏係有啲問題,但至少每次穿越,案情、角色發展、谷final boss 都有新的交錯進展,比較完整。受套劇帶擘,連賀展祥(林偉)都hit 埋,最近電影《選老坐》又有佢做黑社會大佬,搞搞下變下個「黑仔」姜皓文都唔定。


(註:觀眾意來源出自高登討論區、對白Cap圖王 Facebook Group、)
標籤: EU超時任務  

留言


請按此登錄後留言。未成為會員? 立即註冊
  • SoccerFan 於 14/04/2016 評論 NO. 1

    屌!咪又係抄⋯

  • hammer t 於 17/04/2016 評論 NO. 2

    eu

快捷鍵:←
快捷鍵:→