過檔無綫唔紅的亞視出身藝人 精選

亞視過檔無綫唔係咩新鮮事，甚至有如林韋辰、林偉、劉松仁等兩頭走。唔少藝人過檔無線後都發到圍，例如田蕊妮攞視后，近期不斷擔正的煒哥陳煒；過往亦有張家輝、關詠荷、萬綺雯、伍詠薇，甚至江美儀、歐錦棠、苑瓊丹子等都有唔少戲分多而深刻的角色。
早前「六合彩王子」蔡國威Facebook、微博 宣佈與袁潔儀簽無綫。究竟會好似上述幾位咁成功，定好似以下幾位半紅不黑呢？

姚嘉妮（都市閒情cap圖）
先講最紅嗰個。1998年亞姐季軍，2001年己經過咗無綫拍劇。雖然《公私戀事多》、《肥田囍事》、《甜言蜜語》做過女二，但更多係客串大配角/閒角，頂多單元主角如《棟篤神探》，亦唔似苑瓊丹子、林其欣做過出位／有特色角色；尤其是2009年結婚生仔後減晒產，疑似搞圈外生意。近年做主持居多，例如《更上一層樓》、《都市閒情》，後者更與彭慧中、宋芝齡、無敵鴛鴦鏟係一眾「廢青」午間追捧對象。本來有得睇添叔告別作《財神客棧》佢做女二，但就抽起咗讓路俾《公公出宮》。

林子博
（蘋果日報圖片）
1994年參加電視新星大賽入亞視，唯一有人記得係主持過亞視《今日睇真啲》。2000年代中一度轉投東亞衛視，該台2008年停播後，林子博過無綫做娛樂新聞台主持。直到2013年參加《星夢傳奇》後先有多少少人記得，又有得做下《爸B也Upgrade》、《宜室宜居有辦法》。拍過亞視劇及電影閒角的林子博話一直好想再拍劇，但就俾個女爬頭，得到添叔「發掘」，《我的如意狼君》做童年周麗淇。（東周網圖片）

吳綺莉
（蘋果日報圖片）
1990年亞姐冠軍，入ATV 擔正過《中環英雄》、《勝者為王》等劇，90年代至2000年代初先後轉戰影圈及無視都無甚代表作，反而最出名是1999年懷有「龍種」，成龍亦爆出精句「犯了全天下男人都會犯的錯」。約1年後避走上海，直到2011年回流。不過就爆出涉嫌虐女及藏毒；事業亦無起色，商台、DBC都做唔長，返TVB亦只拍過「不死子珊」膠劇《雷霆掃毒》。


何傲芝
（Golden Pixel Artiste Agency圖片）
可能因為老豆係馬主，何傲芝亦從事相關工作。2004年年僅20歲參加亞視商台合辦「馬壇廣播新人王大募集」繼而入行「講馬」，主持過《贏馬 Guide》、《穩操勝券》等，廣受馬迷歡迎。2009年加盟無綫後主要做《東張西望》主持，不過就唔似陳貝兒、朱凱婷之類可以做下其他大show。
何傲芝最為人津津樂道，是前男友蕭正楠疑似因《師奶Madam》而撻着小三黃翠如，微博以蕭正楠奪新人獎時串爆Juno 的一句「邪不能勝正」還擊蕭正楠。


翟威廉
（東網圖片）
曾以翟鋒之名參加2005年亞洲先生入ATV，曾與與連詩雅及當時仍叫「塗俊」的另一港男何君誠拍過劇集《激流青春》，又主持過《第一手真相》、《有腦E班》。2010年大熱姿態棋掃TVB 港男獎項，不過至今演過30幾部劇集仍係大配角居多。雖然去年開始有被捧之勢，做男三男四，但大家都知有時俾TVB 點名力捧嘅最終好多都趕客收場。