發脹「松松姐姐」回巢 TVB！ 精選

「松松姐姐」陳松伶（前名陳松齡）最近錄影《Sunday好戲王》做評判，同集參賽者有喬寶寶、張美妮、「愛瑜伽」何君誠、龔嘉欣。而松松姐姐就透露將會於今年再在TVB拍劇！
（香港01圖片）

松松姐姐1985年《歡樂今宵》「似模似樣模仿大賽」扮葉蒨文唱《零時十分》而入行。當時約14, 15歲的陳松齡，雖然歌藝不及沙莉，但一雙厚唇，以及一頭時興東洋短髮，又確有幾分神似又討好：
（葉蒨文；蘋果日報圖片）

（蘋果圖片）
1989年與黎明拍《天涯歌女》，分別飾演周璇及嚴華，2人一舉爆紅。松松姐姐自爆當年爆紅純粹「意外」，因為屋企不小心被滾湯淥腳而送院，而當時拍過《天蠶變》、《天龍訣》、《神鵰俠侶》、《天龍八部》等叫好叫座武俠劇的經典監製蕭笙有份探病，松松姐姐說可能當時個款夠慘情才有幸演歌女周璇一角。
紅成點？順手帶紅《天涯歌女》唱片賣6白金，1991年再以同一方式添食《月兒彎彎照九州》，只是以鄭伊健換上黎明，同名唱片更賣到8白金。（註：2006年前本地白金為3萬張，以後為1萬5）

松松姐姐自此成為一線花旦，90年代多次擔正女一，例如《笑看風雲》、《天地男兒》、《大澳的天空》。2000年代開始減產，但《金裝四大才子》做寧王（高雄）女兒朱娉婷，與開口埋口「孔曰成仁，孟曰取義」的木獨佬文徵明一pair 亦為不少觀眾所記得：
（新浪圖片）

就算無睇／未睇過上述劇集，這首兒歌《烏卒卒》都識唱喇掛！

（《飛短留長父子兵》TVB劇照）
2005年松松姐姐與劉丹、「2185個穎」拍完在TVB 連續劇遺作、「材叔」梁材遠監製的《飛短留長父子兵》之後就上大陸掘金。當亞視臨收皮都仲可以食招牌老本引到人嚟選亞姐，松松姐姐的《天涯歌女》、《月兒彎彎照九州》真係夠佢喺大陸搵唔少。上大陸另一收穫是與小生張鐸結緣並結婚，投資地產有道，身家億億聲。
曾被「發現」與黃智雯撞樣的松松姐姐，雖然昨晚笑稱自己是「吸濕大笨象」，因近日潮濕而水腫，驟眼望仲以為係近年另一發脹的資深綠葉姚瑩瑩：
（東網圖片）

但唔緊要，時下興肉地熟女，近年轉搞胸圍底褲生意的松松姐姐，真係做到生招牌。2003年做皇室纖形代言時亦仍平平無奇，但去年就自爆由A Cup升到 F Cup，不過就唔敢親自拍廣告咁話。堅定流唔知，總之小心騙徒啦。
（Face圖片）
（蘋果日報圖片）

本年1個月已經傳過松松姐姐會在4月返TVB拍《師奶大翻身》（暫名），未知是否因此而有此身形／形象。而監製暫定為拍過《師父·明白了》、《愛我請留言》、《陪著你走》、《鐵馬戰車》等「佳作」的陳耀全。當你劇本爛唔晒又如何，相信同「撈家」回巢谷李佳芯的作用一樣，今次到松松姐姐帶下王浩信（暫定），雖然王浩信的確值得谷下嘅，而且應該無咖啡豪做教主帶成班僂儸咁吃力。