《潮流教主》蔡思達圈子瞬間和好、教主車被扑；網民：兒戲到爆！ 精選

12集臨完場另一單，講紀芸芸（李佳芯）失蹤老公（陳家輝）突然殺出，打爛教主（陳豪）車頭玻璃。要做到，就要紀芸芸因為落雨又截唔到的士，跟手撞啱教主同時走人又肯車埋佢，仲要知道教主行邊條路同時又要紅燈停喺某個位。咁都算到，勁過神算軒之餘，落到大雨濛濛都可以認到自己老婆喺教主架車，視力都要有返咁上下。最重要係睇完第13集會發現完全無需要咁樣鋪個老公出場：

順手講講成套劇。比起之前《衝線》、《鐵馬警車》的煩膠新人，今次蔡思達其實無咁趕客，因為至少煩得有多少道理。雖然觀眾網民話《潮流教主》講辦公室政治多過潮流，但至少勾心鬥角都算圍繞潮流／雜誌圈，講離題拍馬追唔上《衝線》。何況睇角色穿着、片頭片尾、主題曲各樣，就知無綫如果真係講潮流嘢就仆硬。

而且so far其實未至於太多大膠位，只係唔多夠力。《Modes》環境本身只係弱肉強食，無話對錯，不過華人圈慣咗主角要正面包裝（例如今次咖啡豪對鄭子誠有義氣），咁紀小姐就焗住要做奸。問題係佢角色三兩下被葉朗收皮，其實同阿Yan一樣得個煩字；演技更加只係普通，正式由內到外都奸唔出「樣」。反而所謂只用下體思考的觀眾就撐得啱，因為佢都算姣，可以接陳法拉棒；亦所以最近幾集編劇老屈陳山蒽為紀小姐神魂顛倒反而勉強過到骨，但亦極有可能合理化之後的神展開、開大技之類的膠位（我估會有）。
不過坊間已經吹奏到李佳芯奸到出汗，拍得住羅蘭姐，咩接棒做奸后。劇中紀芸芸話齋：「跟得我嘅就要水鬼升城隍」，所以陳瀅、楊秀惠、許亦妮、莊思敏讀稿式演技已經係視后level；而李佳芯都應該要改口叫「芯姐」，等攞終身成就獎。