港男有邊個發到圍?

娛樂之王 於 12/03/2016 發表 收藏文章
上篇講過亞視都搞過電視先生,捧紅過人。而2005年開始選港男的無綫,以下十幾位雖然活躍於電視圈,但上到位的又有幾多?

高鈞賢
先講2005年首屆港男冠軍,高鈞賢是比蔡思達更早似木村的選美參賽者。雖然初時靠個樣,加上選舉表現得到司儀Do姐加持,撈到2007年有得拍倉底劇《幕後大老爺》做男二,但越撈越霉,《寒山潛龍》要非禮阿婆,自己都頂唔順而約滿走人。離巢後除咗搞餐廳、車房生意,仲返大陸拍劇《山海經之赤影傳說》,同劇仲有關智斌。

鄭健樂
2005年「健力組」冠軍,總冠軍敗於「瀟灑組」冠軍高鈞賢後簽約TVB拍劇,不過亦有眼利觀眾網民發現他早於1997年星爺的《算死草》就已經做過陪審員。Rocky演出戲集頗多,多屬過鏡角色。本為健身教練的Rocky,玩 CC fitness的新《愛回家》自然預埋佢。網民撐得啱,如果睇張振朗、何君誠的,橫掂都係無演技,起碼Rocky睇得開心先。

黃長興
2005年港男健力組敗於Rocky;入行10年,演技、口才都普通,睇《湊仔攻略》就知。不過似乎專心搞法國餐廳居多,TVB 似客串性質,咁咪醒囉。

陳志健
2006年健力組冠軍,總冠軍敗於黃長發。Otto 曾經憑《仁心解碼》患自閉症的子浩、《拳王》的阿力被觀眾網民讚,但本人認為吹大咗。因為都唔好講「愛瑜珈」無發揮的角色及劇情,只要睇過《張保仔》佢做小虎,就知佢淨係識凸眼扮嬲,睇得出落力演但就無火,被觀眾網民形容為「TVB劉馬車1號」(2號為黃浩然)真係夠晒貼切;而且一陣讀稿味,又係健力組出身,其實只是「弱版」的Rocky,應該要向岳父羅樂林偷偷師。

姚浩政
2006年落選港男;主要做主持,據說出面開班好爆滿,係咪咁有料觀眾唔會知道,因為去到邊都仲有阿旦鄭丹瑞。拍劇大茄居多,但《使徒行者》因做歡喜哥手下而有不少鏡頭(上圖右,左為林偉)。

袁偉豪
2007年勇奪港男冠軍前已有不少幕前經驗,例如廣告做「維他奶仔」、《新古惑仔之少年激鬥篇》做巢皮、《賭俠1999》做華神細佬、《重案黐孖Gun》信仔等等。簽TVB,等到2012年《On Call 36小時》首次有男三做,平穩普通;去年《拆局專家》首次做男二,劇本唔得以致演出平平。
代表作一定係膠劇《鐵馬戰車》,就算不計與姚瑤的感情線,做嬉皮笑臉唔定性的督察施馬Sir亦唔趕客,而且名義上男二但劇份多過、搶過男一大隻斌。係力捧緊,《飛虎》監製林志華疑似翻炒《無限復活》的《EU超時任務》就快出街,之後會有《城寨英雄》,即管睇睇值唔值捧。

李豪
2007年港男;多得《愛回家》同馬子妮一pair為部分觀眾所認得,不過就被觀眾認為太乸型、講嘢煩而入唔到屋。演藝路暗淡,不過假假地都同羅鈞滿、張景淳、沈震軒3個TVB力捧藝人唱過歌《獸拳戰隊》:

何君誠
2007年曾以塗俊之名演出亞視劇集《激流青春》,由張達明、黃一飛、邵仲衡帶新人,包括連詩雅和仍叫翟鋒的翟威廉。2008年落選港男,so far 「代表作」為《愛回家》Billy,死未。

羅天宇
2008年港男少年組冠軍。做大茄,直到2012年《愛回家》馬子仁一角入屋,全靠劇中他和阮兒 Pinky 生B,馬家有得回巢救何君誠、張振朗。人生最大成就是曾經溝掂苟姑娘,雖然苟姑娘堅稱「好守規矩」。

溫家偉
「大隻仔」2008年港男少年組大熱倒灶,入行後通常做傍友或者主角好友,例如《衝線》的「賤熊」、《鬼同你OT》的「慢黑鈍」;亦因口音而常做ABC角色,例如《鐵馬戰車》做揸車問路的鬼仔。最近演出為《潮流教主》,做難得唔使做姦角的攝影師「認字特警」助手。

郭田葰
2009現場最具人氣香港先生,做主持居多,例如《明珠生活》、《港生活.港享受》。因醫生出身而成為TVB 御用醫生之一,例如《拆局專家》、《樓奴》、《On Call 36小時》;《實習天使》做埋顧問之一,但點解咁多甩漏位俾護士插到反艇嘅?

許家傑
2009年冠軍,拉丁舞好手。keep 住每年6-10套劇出街的老是常出現大茄。最近演出有《愛情食物鏈》用下欄扮上菜的廚師Augustino,和《公公出宮》胡定欣內定招親對象高軍。

翟威廉
2005年亞洲先生亞軍,2009年約滿後,2010年參選港男橫掃8獎,入TVB做閒角居多。《華麗轉身》已經算有較多戲份。話曬參選時橫掃都要係咁咦捧一捧,之後會有套港韓合拍劇《七天的浪漫》做男三,脆魚姐擔正,陳智燊做男二,牌面趕客到呢。

白健恩
演藝學院跳舞出身,2010年落選港男。從影唯一令觀眾記得是2012年《法網狙擊》迷姦高Ling。翌年拜徐家傑為師學古泰拳,去年再拜馬天樂本合門門下,密謀做影圈打仔。唔知幾時先可以做到下一個伍允龍呢?

上述一堆港男,多數表現、發展都麻麻,得袁偉豪暫時似樣(但其實《Sunday好戲王》第1集已經露露地底)、Rocky夠奇離,其他真係爭啲特色同實力。無料唔緊要,起碼搵到自己位置。唔似港姐,三甲如「蔡思達」、「0波琳」到最近的邵珮詩、王卓淇,一埋位就女二女三起跳等做女一,盞觀眾睇劇睇到爆血管。

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→