敖嘉年秘婚兼離TVB 北上搵人仔;敖嘉年重要角色回顧

娛樂之王 於 07/04/2016 發表 收藏文章
(on.cc 東網圖片)

仲有睇TVB 8點半《末代御醫》就知,敖嘉年飾演的光緒王,俾人害到病入高肓,集集都就去就去咁款。原來現實中敖嘉年都一樣「就去」。據今日東方日報報導,事緣近日是敖嘉年與女友相識16周年紀念,敖嘉年就向東方日報「洩蜜」加拿大婚照,自爆已結婚之餘,一早夫妻檔開廣告公司「搵外快」,之後又會上大陸拍戲/劇搵人仔。所以敖嘉年之後只會與無綫簽部頭拍節目,變相「離巢」。
(on.cc 東網圖片)

敖嘉年入行前讀過時裝設計,跟過張叔平做服裝指導;又做過港台、新城DJ。1998年加入tvb,做《城市追擊》、《全線大搜查》、《娛樂直播》主持。但TVB 有幾多個「輝仔」、譚玉英姐姐之類「緊守崗位」咁多年,敖嘉年慢慢拍埋劇,以下是幾個比較成功的演出:

2001《封神榜木吒
角色唔搶鏡,播出之時有無人留意/記得就唔知,不過無綫係咁翻播播到人記得佢都唔出奇。(TVB 午間劇場《棟篤神探》又重播!幾時又再重播這堆劇?

2004《金枝慾孽汪公公
戚、周神劇2人組大堆愛將如佘詩曼、陳豪、黃德斌有份演,當時仍係大配角的敖嘉年飾演佢自稱「少少奸」的汪公公,恰如其份,成功在「如妃」、「玉瑩小主」等一眾大人物的鬥爭之中點綴,逐漸累積觀眾緣。

2009《巾幗梟雄蔣必文
自私、不擇手段的二世祖;雖然比起張松枝,爭咗啲氣焰以及事敗時裙腳仔式的窩囊,但都夠乞人憎。蔣必文亦係敖嘉年真正起朵作,入圍「最佳男配角」5強兼攞「飛躍」。
(tvb.com 劇照)

2010《巾幗梟雄之義海豪情排骨仔
愈怕事,就愈集集俾人恰,繼《巾幗梟雄》後再次成功成為添叔李添勝、張華標公式的高潮位常客。
(蘋果日報圖片)

2011《魚躍在花見魚至寶
開拓另一劇路之作,今次做「傻仔」。雖然套劇整體麻麻,敖嘉年的演出、造型又一浸阿旺除,不過都算合格。
(hkgolden 圖片)

2012《造王者大殿下趙貴誠;
做完傻仔做痴線佬,不過今次就拆招牌。痴線佬係咪等於淨係識集集「許許許許許…」呢?

2015《鬼同你OT查理
膠劇《神探高倫布》包平安之後,再度做奸仔,同關禮傑偷公司圖則,演出穩陣。《鬼同你OT》原班人馬添食作《來自喵喵星的你》相信就係敖嘉年在TVB的「遺作」。
(tvb.com 劇照)

2015《鐵馬戰車榮德謙
雖然只是case 男主角,但挑釁大隻斌演出夠晒搶鏡,做反角仔已經做到駕輕就熟。
(mytv cap 圖)

敖嘉年今次可以去大陸拍《盜墓筆記》電影版,全靠食過夜粥。講起食夜粥當然要提「欺師滅祖」一事,算係敖嘉年另類代表作。事緣2010年10月尾,《花花世界花家姐》煞科宴,敖嘉年被冼灝英拳打和扔玻璃杯,左眼角需縫針,要報警收場。此事繼而被揭從小習武的敖嘉年,不時向精通大聖劈卦、人稱「冼師傅」的冼灝英討教交流,平時亦「師傅」前「師父」後,豈料冼師傅得知敖嘉年竟向娛圈內另一大聖劈卦前輩陳觀泰斟茶跪地拜師,令冼師傅有感被背叛,繼而動粗。
(on.cc 東網圖片)

其實敖嘉年近年先開始算撈得起,雖然演技漸受肯定愈見平穩,但紅就絕對唔講得上;又或者所謂「紅咗」之後,其實多咗幾多演出機會同收入亦係床板夾 XX。雖然 ViuTV 主打綜藝節目,唔算好直接同無綫對撼,但無綫要keep 住劇的質素,最大鑊唔係小生花旦逃亡潮,而係啲所謂配角綠葉走晒,所以近年搵潘志文、陳松齡救亡都算,連吳岱融、曾航生、胡渭康都居然照殺。

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→