【悼念亞視系列】亞視高質外購日劇

娛樂之王 於 03/04/2016 發表 收藏文章
無綫早於1970年代已經持續購入日劇/日本電影。《柔道龍虎榜》、《赤的疑惑》黑白片唔講,年輕觀眾相信都會記得無綫買過《悠長假期》、《戀愛世紀》、《Engine》、《冰之驕子Pride》、《夢想飛行Good Luck》、《HERO(律政英雄)》一大堆「木村大神」的高收劇。就算木村以外,《同一屋簷下》、《金田一之少年事件簿》、《跳躍大搜查線》、《新聞女郎》、《西洋骨董洋菓子店》,以至大河劇《大奧》,近年開埋J2 追住日本嚟買更加唔使講。總之唔係卡士強勁,都是人氣作品。

不過,於80年代尾開始持續購入日劇的亞視,其實都入唔少高質日劇。
(註:以下「主演」僅指主要演員,並非日本「主演」、「助演」之分法)

《東京愛的故事》(亞視購入播出年份,下同:1993)
(girlschannel.net圖片)
主演:鈴木保奈美、織田裕二、江口洋介
經典愛情劇,小田和正唱的主題曲《突然來的愛情故事(ラブ‧スト リ は突然に)》唱到街巷聞。乜乜歷來百大/50大經典日劇長期名列前茅之作。Youtube有得睇。

《101次求婚》(1994)
(genmai-asuka.com圖片)
主演:淺野溫子、武田鐵矢、江口洋介
基本上地位與《東京愛的故事》相約,又有已經紅咗嘅江口洋介。不過今次再紅多個武田鐵矢,同埋唱主題曲Say Yes的 Chage & Aska,亦即香港人戲稱的「叉鷄」。

《G.T.O.麻辣教師》(2000)
(www.officiallyjd.com圖片)
主演:反町隆史
反町隆史代表作,平均收28點。之後再翻拍的G.T.O,唯一有機會超越呢套嘅,只有新嘅學生妹,而唔會係鬼塚英吉。

《庶務二課》(2001)
(速報日刊エンタメスクープ圖片)
主演:江角真紀子、寶生舞
唔係神作。基本上可以當佢《愛回家》咁睇,不過係好笑版咁解;一貫Case 劇,撇除每集最尾江角真紀子的說教(就好似劉丹做緊嘅嘢)位,輕輕鬆鬆啱晒唔使/想用腦觀眾。衰衰哋頭2輯連SP 平均都收超過20點,衰添食愈玩愈悶。

《大和撫子》(2001)
(ゴゴゴゴ!! livedoor blog 圖片)
GTO 高收,反町隆史功不可沒,而他最大的收穫可能係識到松嶋菜菜子。松嶋菜菜子當然亦受惠於G.T.O.,之後拍過長壽醫療劇《急救群英》、無綫有買的《魔女的條件》同瀧澤秀明玩師生戀,人氣同收視都唔錯。此時亞視買左松嶋菜菜子其中一部代表作《大和撫子》,她演日日釣金龜的貪錢空姐。

《美麗人生》(2001)
(www.tvbamboo.com圖片)
主演:木村拓哉、常盤貴子
眾所周知木村拓哉與松隆子是最強螢幕拍檔,2人合作的《HERO(律政英雄)》更係木村歷來主演平均收視最高作,但第2收視高作並非《悠長假期》或《戀愛世紀》,而是亞視買的《美麗人生》。

《白色巨塔》(2006)
(www.officiallyjd.com圖片)
主演:唐澤壽明
富士電視台開台45週年劇,已過身的暢銷作家山崎豐子改編作;較年輕的日劇迷相信會睇過木村主演的改編作《華麗一族》。除非你特別想睇某特種醫療部隊或個別演員,否則想睇一般醫療官僚黑暗嘢睇呢套已經夠。
《野豬大改造》(2007)
(papipu2ch.blomaga.jp圖片)
主演:堀北真希、龜梨和也、山下智久
表面係一般偶像校園劇,雖然又係校園 XX祭、多角戀、師生衝突、升學等,但青春、身份認同 的反思成功而唔算太矯情咁融入咗 山P、龜梨改造陰沉的堀北真希胡鬧過程之中。平均收視約唔算高,約16點,但成為不少劇日心中「神劇」,直至他們看到宮藤官九郎《對不起,青春》。

《我miss係大佬》
(muutnet.com圖片)
主演:仲間由紀惠、生瀨勝久
同名漫畫改編作,套路其實似 G.T.O.。不過反町隆史sell chok sell熱血,仲間由紀惠的大佬miss就偏輕搞笑路線。而且回望《我miss係大佬》的學生卡士:松本潤、小栗旬、成宮寬貴、龜梨和也、三浦春馬…人氣方面 G.T.O. 的學生哥真係無得比。

《篤姬》(2010)
(anthony910096.pixnet.net 圖片)
主演:宮崎葵、堺雅人
講嚟講去都係時裝劇,得《阿信》係古裝。有跟開日劇都知重視歷史的日本人,每年NHK都會製作約50集的大河劇。無綫2005年開始買咗富士電視台的《大奧》,亞視就喺2010年買NHK的高收作《篤姬》。近年大河劇質素同收視都麻麻,對上一套好啲嘅可能已經係福山雅治的《龍馬傳》。而《篤姬》就係2000後暫時收視最高的大河劇,每集都收20點以上。

以上至少有幾套都係放喺星期六日八九點檔食飯時間,唔似無綫咁放到十點幾,不過有幾多人睇就真係唔知。同埋買得好係一件事,電視台始終都要有自己製作,不過如果無或者差,而外購又唔得,咁就真係等摺。至於大陸、台灣、韓劇,亞視都入過唔少大熱高收劇,下次再講。

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→