亞視、《愛回家》同日齊齊收皮,「結局」鬥老套、鬥失望?

娛樂之王 於 02/04/2016 發表 收藏文章
昨日4月1日,香港2大電視台都有「收皮作」,先講8點鐘TVB《愛.回家》,播出第995集大結局。劇情又係一如以往的「誤會」啦,發散晒人、叫埋曹總、超人出重賞搵馬家好,原來家好瞓覺一個華麗轉身跌咗落紙箱,跟手劉丹一句「原來最珍貴嘅喺屋企」,叫觀眾「愛回家」咁話,仲要叫夠幾次,驚死唔夠煩。不過勉強都叫俾你兜到嘅。至於Fans 最失望應該係連馬子妮都結埋婚,但到最尾德如就未能回歸同馬壯成一pair。

之後扮cut機、扮唔捨得、扮太入戲抽離唔到…咁樣去講《愛回家》陪住啲觀眾4年幾,相信啲忠實fans 都流晒眼淚,又順手sell 埋《八時入席》。


無論鍾唔鍾意/有無睇《愛回家》都好,其實齋講呢段都唔算核突嘅。但你又畫蛇添足,係都要跳返段老舞:

之前《畢打自己人》又係咁,係咪欣宜主題曲真係咁好跳呢:

另一套處境劇《誰家灶頭無煙火》又跳,
(新浪圖片)
《On Call 36小時》又跳(wikia 圖片)

其他咩《強劍》、《老公萬歲》…都唔講喇,老套到呢。


至於亞視,晚上11時59分59秒,大埔廠同慈雲山發射站熄大掣,話cut就cut 變blue screen。明明亞視節目部執行主任程啟光話,11時59分07秒亞視會有「告別卡」同觀眾道別,說好的告別卡呢?原來無嘅,連盛品儒都話好失望。

樹倒猢孫散,亞視員工大合照都係人之常情。
(亞視新聞部資料室根叔圖片;取自明報)
原來亞視員工在天台BBQ,真係好有大結局feel。
(亞視新聞部資料室根叔圖片;取自明報)

一個就日日俾人問幾時熄機問咗幾年嘅台,一套就自開播以來插足咁多集直至馬家回歸,齊齊收皮。即管睇下新嘅免費台同新嘅愛回家會唔會仲趕客,話唔定一開播啲人覺得睇返本港台、歲月留聲啲翻播劇仲好,或者唔夠一個禮拜已經想馬家入席。

留言


請按此登錄後留言。未成為會員? 立即註冊
    快捷鍵:←
    快捷鍵:→