【小男人週記】過年過節揀戲睇，寧取「冇腦」，不要「深度」。

適時嘅「冇腦」係一種Relax，過年過節，揀啲輕鬆喜劇睇就最啱。所以過年睇戲係冇必要去計較什麼中唔中伏，只要套嘢唔係悶，有鹹有甜有劇情，應該收貨。
你要挑剔一部電影，梗係可以搵一千個理由去講，唔係話你無理取鬧，只不過每一個人對戲/劇集都有唔同嘅睇法。

一年三百六十五日，大把時間追求「深度」，但過年過節，我唔想諗咁多嘢。好似【小男人週記3之吾家有喜】咁，有人話鄭丹瑞食老本。但人哋食老本之餘又交到一哋新嘅嘢，賀歲電影嚟講，係咪真係要佢十項全能，攝影呀劇本呀剪接呀音樂呀演技呀等等…都要達到金像獎入圍電影嘅標準？

所以點解人哋寫影評主要講新戲，我寫影評係主要講舊戲，係因為我明白到，我睇完新戲去讃/踩佢，會影響到其他人睇戲嘅心情。點解我唔可以抱住欣賞嘅角度去睇港產片？我寫影評係想推介，等大家發掘錯過嘅好戲，發掘當中嘅亮點，而唔係想摧毀一套戲。
我夠知九記牛腩難食啦，但我理解為何佢可以屹立不倒，仲有咁多老主顧幫襯佢。因為好多人都係食一種回憶，食一種感情。

同樣道理，睇【小男人週記】，相信唔少人都係因為回憶同感情先入場支持。

睇戲唔諗嘢亦係一種境界，人生在世已經太多嘢要諗要煩，如果睇一套賀歲檔期上映嘅電影都要諗餐死，咁我覺得做人太辛苦啦。

唔係建議各位全年「冇腦」，只不過有時候「冇腦」係勝過「深度」，在此祝各位新年快樂。

全片：

https://www.youtube.com/watch?v=0mVwfKHxBKY