【被嚴重低估嘅實力派】羅莽唔只功夫了得，飾演大奸狗一樣入型入格。

【葉問2】有場戲，係講葉問（甄子丹飾演）為咗開武館出嚟挑戰各大門派，對決嘅舞台只係喺一張大圓檯上。葉問打到羅師傅（羅莽飾演）飛落地下。
過去二十年，羅莽被定型為帶有少少喜劇效果嘅綠葉。大台係咁，電影圈亦係咁。以致好多人唔知道羅莽係當年邵氏著名動作演員，人哋出名到喺外國有一大把fans支持佢添。

人嘅際遇真係好難講。甄子丹憑借一套【葉問】翻身，名成利就，羅莽呢？仲住喺黃大仙下邨，得閒會客串下電影，拍下大台劇集。

小弟對功夫片唔太熱衷，但好敬佩佢一身硬橋硬馬嘅功夫，六十幾歲仲keep住練武；對於羅莽，印象最深係【伊波拉病毒】嗰嗰粗口橫飛嘅老闆，最後俾黃秋生殘殺；其次就係【廟街故事】嘅呢個惡人。
或者羅莽唔可以好似甄子丹咁等到一部【葉問】翻身，但實力派演員，就好似漆黑中嘅螢火蟲咁，咁閃咁亮咁吸引人。唔好以為冇人記得你呀，羅莽，你做戲好好睇咖！

有關羅莽嘅新聞：

【豪語錄】八嚿腹肌唔使做gym　羅莽：講身材我最正

https://www.youtube.com/watch?v=1-72Ua6vUUI

【豪語錄】香港唔興真功夫　羅莽美國有狂迷

https://www.youtube.com/watch?v=mDgH4hZfPtw

廟街故事全片：

https://www.youtube.com/watch?v=Z2a7bZ2Xjc4