【細路祥】我心目中最靚嘅女主角——阿芬 精選

出世地點真係咁緊要？香港出世同大陸落嚟，點解要成為評定人格美醜的分水嶺？
土生土長可能係一種優越感，但唔代表係人格高尚嘅保證。

同樣地，大陸落嚟亦唔應該成為人格醜陋嘅代名詞。

【細路祥】嘅影評好多，不過唔同人有唔同觀後感，我對戲中嘅阿芬印象好深刻。

阿芬係小人蛇，老豆跛咗，老母帶住阿芬同佢細落偷渡落嚟，靠打散工維持生活。年紀細細既阿芬已經幫老母洗碗，去祥仔老豆開嘅茶餐廳見工被婉拒，而同樣年紀細細已經兼職送外賣賺錢嘅祥仔搵埋阿芬，一齊送外賣賺錢。

或者只有喺小朋友嘅世界，先至唔會有歧視。祥仔明明可以一個人送外賣賺曬啲錢，但係佢主動搵返阿芬一齊送外賣，可能佢係想識朋友，但係無可否認，祥仔好大方咁分一半tips俾阿芬。
因為錢而認識，亦因為成日見，建立友誼。

邊個話香港人唔可以同大陸人做朋友？只要守望相助，腳踏實地，我理得佢大陸人定非洲人，邊個係土生土長，邊個係新移民，又有乜野好執著呢？

自問 「我哋都係中國人」，呢句說話我係講唔出口。

但係「我哋都唔係敵人」，的而且確我係應該講出口。

千錯萬錯嘅從來都係政府同執政黨，而唔係人民。

https://www.facebook.com/%E8%88%8A%E7%9A%84%E6%B8%AF%E7%94%A2%E7%89%87%E6%96%B0%E7%9A%84%E5%BD%B1%E8%A9%95-376288029162279/