【家有囍事1997之爆笑影沙龍相】BB油冇，得啲白花油就有，我出去攞！

我諗呢段係成套劇少數唔夾硬嚟而又笑得出嘅一幕。【家有囍事1997】難以複製【家有囍事1992】嘅經典，卡士強勁，劇情唔錯，但太多夾硬嚟嘅橋段，欲速則不達，反而冇咁好笑。
就好似有個人搏命拎把鉗咁撬開你把口嚟笑，就算最後都係笑，都係勉強地笑。

而【家有喜事1997】係周星馳少數孭飛但周星馳唔好笑嘅電影。我諗唔關周星馳事嘅，出事喺編劇黃百鳴度。

有睇開黃百鳴嘅電影，都知道佢鐘意copy過往成功嘅方程式，總之條水係啱嘅就食住上不惜食到最後爛水爛喉。

【家有囍事1997】堆砌唔少夾硬嚟嘅笑嘅元素，可惜真係唔多好笑。

咁呢套係咪爛片呢？我認為唔係爛片，佢只不過係落錯笑料嘅溫情片，如果唔計啲夾硬嚟嘅笑料，呢套【家有囍事1997】係幾好睇嘅。
正如好多人話周星期嘅【長江七號】唔好睇，我認為，係大家太熟悉周星馳式嘅無厘頭，所以當佢冇咗無厘頭，大家咪好唔習慣，覺得周星馳陌生咗，唔係【賭俠】嗰個周星馳呀。

【家有囍事1997】同【長江七號】一樣，係大家見到喜劇大師周星馳期望佢會無厘頭，結果佢冇無厘頭，就係咁咋嘛。兩套電影都係sell溫情，只不過係一部夾硬嚟加笑料，另一套比較順咁嚟加笑料。

同埋，如果經典咁易copy，咁佢本身都唔會係經典啦，唔係話拎住個牌頭，加大卡士，就亂咁加笑料都經典嘅。

全片：

https://www.youtube.com/watch?v=8AYxM7eT5SY&t=2742s
另外歡迎各位follow 舊的港產片新的影評 YouTube Channel 方便大家睇返啲電影精華片段：

https://www.youtube.com/channel/UCKIM0AsqBg6Jnqt8lVke7Ww