【季終討論】耐人尋味! 主角被活生生打死?!

美劇世界 於 11/04/2016 發表 收藏文章

短短 8 集眨下眼又播完,粉絲們又要等多半年先有得睇!等美劇世界同你重溫一下今季發生過既事啦!
1. Rick、Michonne 重口味
利申,小編並唔係一個種族歧視既人。但真係估你唔到,由一開始既 Lori 去到今季慘死既 Jessie,大家都覺得 Rick 你條友仔真識食。劇情交代亦十分奇怪,點都估唔到,Jessie 第 9 集慘死,你第 10 集已經同 Michonne 搞埋一齊,真係接受唔到!其實 Michonne 一直係我心目中既形象只係一個鐵血戰士,佢地正式成為小編最不期待既一條支線。

2. Carol、Morgan 跟住矛盾去做人
今季有好長時間交代佢地兩個之間既矛盾,呢條線其實幾好睇。一開始 Carol 盲目殺人,而 Morgan 就相信人命比一切重要,係處理 Wolf 生死既時候佢地仲試過拔槍相向!但到後期開始交代 Carol 原來一直只係為左保護大家,殺人無數令佢受盡良心責備。已經厭倦殺人既佢決定隻身離開 Alexandria,孤身上路。而 Morgan 發現之後亦外出搵佢,到底佢地兩個係外面會有咩火花?話說今季 Morgan 起左個監獄,佢地兩個下季會唔會周圍導人向善呢?

3. Glenn、Maggie 不死傳說
今季 Glenn 被幾十隻喪屍圍住死裡逃生,而 Maggie 更加同 Carol 兩個打嬴十幾個... 老實講,小編一直都鐘意 Glenn,又靈活又聰明,十分討好。而 Maggie 亦都唔錯,今季仲慢慢開始擔當要角,幫手規劃 Alexandria,又負責同其他團體進行談判。但佢地兩個今季既不死奇談實在令人太O咀,比人一種十分谷收視既感覺,小編對於佢地個今季既劇情十分失望。至於劇情去到最尾 Maggie 有小產既跡象,係呢個物資衛生短缺既世界末日中小產,到底佢會唔會又再一次離奇地不死呢?

4. Carl、Enid 小情侶
Carl 今季除左盲左一邊眼之外,其實都無咩劇情。至於Enid,由一開始既煩膠,到之後既「JSS」慢慢地有令人討好既感覺。今季曾經出走過,之後慢慢地融入 Alexandria 既生活,最後亦同 Carl 之間有感情戲。但網上流傳一個好令人震驚既論述,到底 Enid 係唔係一個「臥底」?連 Forbes 都有篇文章詳細解釋,由佢既背景、行為、甚至係佢睇既漫畫進行分析,有興趣既朋友可以去呢度睇下:"There's Proof 'The Walking Dead' Showed Us A Spy Last Night"

5. Abraham、Eugene
Eugene 係小編其中一個喜歡既角色之一。Abraham 係一個鐵淨淨既漢,Eugene 則係一個傻下傻下既毒男。由 Abraham 發現 Eugene 呃佢係拯救世界既科學家開始,就一直睇佢唔起。今季就講 Eugene 點樣一步一步站起來,學揸刀揸槍,最後更加願意犧牲小我完成大我,令 Abraham 對佢另眼相看!值得一提既係,Eugene 寫左條製造子彈既秘方比 Rick,會唔會係一條伏線講下季 Rick 點樣被 Negan 搶盡資源下秘密造子彈還擊?

6. Negan
最後去到 Negan,我諗每個 Walking Dead 既 Fans 都對今季個結局又愛又恨,鋪排左成季既 Negan 終於出場!今季 Rick 佢地殺左好多 Negan 既手下,最尾一集 Negan 進行大報復!一場大龍鳳捉左大部分既主角,劇終之前仲用 POV 既鏡頭交代 Negan 將其中一個主角活生生打死!到底邊個死左呢?呢個結局係網上引起極大回響,個個都講緊邊個會死!

其實導演早前訪問就交代過,第 7 季其實仲未開拍,就連演員本身都唔知邊個會死!老實講,Aaron 本身係二打六,而且根本唔需要跟埋去 Hiltop,但劇情刻意交代佢想報恩,所以小編覺得導演安排佢被犧牲係絕對合理!其實 Negan 真係幾型而且又夠狠,比之前個單眼佬反派好好多,下季同 Rick 之間既對決應該會幾好睇!

https://www.facebook.com/hkustv/
小編岩岩開始成立呢個「美劇世界」,你既支持係我寫文既動力,請到 Facebook 比個 Like!Facebook Page 會定期報導最新資訊、劇情討論同精華重溫!
www.hkustv.com

如果喜歡我們的文章,請即分享到︰

標籤: 美劇  AMC  The Walking Dead  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→