其實我真係好愛周星馳
平時一路都唔會廣東話寫
但係講到周星馳
作為一個香港人實在係要用返廣東話講食神先夠原汁原味
真心其實周星馳無乜邊套我唔鍾意
簡直就可以話食周星馳奶水大既我
(我相信睇緊呢篇文既你好有可能都係)
對住食神咁多年黎都好有特別既情感
其實呢套都唔係佢第一次自己執導既戲
(之前仲有國產凌凌漆同大內密探零零發)
但係食神係真係唔同架!!
其實就咁睇d人物
一個一朝得志驕傲到不得了既史提芬周
一個勁樣衰又粗魯到無人要既火雞
一個貌似同史提芬周好fd既老闆
一個表面上傻下傻下既跟班唐牛
同平時周星馳電影既架構都好似
直情唔洗睇五分鐘你就知史提芬周一定會比人陷害
唐牛一出黎你就估到佢肯定係奸既
火雞一開始煮拿渣麵比史提芬周食肯定跟住就愛上架啦
乜都估到咁點解會咁經典呢?
先唔講d金句住
食神成套戲入面既人都有一個共通點:
外表同內裡其實係可以好大分別
你以為真既野其實係可以全部都係假
史提芬周望落去係一個廚藝高超既師傅
但其實佢根本完全無料到
火雞係樣衰
但原來佢未為史提芬周擋一刀之前係個大美人黎唐牛對住史提芬周忠心耿耿
但原來佢係有備以來埋史提芬周身跟住一野打沉佢
中國廚藝訓練學院聽落去好似好勁好pro咁
其實根本只係少林寺個廚房
但係咪佢唔係一個專業學校就唔會培養出人才呢?
你以為啦! 問左少林寺十八銅人未呀?
仲有方丈呢! 你當佢流架?
就連到最後個食神大賽入面
唐牛表面上係隻手遮天咁做左食神
但係比觀音好似用照妖鏡咁整一整佢
佢只係一個內心空洞唔完整既人
仲有仲有
黯淡銷魂飯!!
你以為佢只係比盡你咪22蚊碗既叉飯咩?
其實佢係包含住史提芬周對火雞既愛同埋遺憾先整到出黎
有血有淚真係好黯然同真係好銷魂既飯
所以先食到好姨都要喊咋嘛!
可能有D人會話
車! 食神有乜咁好睇JE
周星馳咪又係做果D自大乞人憎最後變好人既角色咋嘛
百變星君仲搞笑啦仲有靚女睇添
咁你就好明顯唔熟周生啦
史提芬周同其他既角色最大分別係佢已經唔會再用果D擠眉弄眼+極度誇張既表情動作黎引你笑
仲想睇呢d樣?
無架喇! 呢D誇張野佢已經比左其他人做啦
例如係佢
同埋佢
呢個咁大個轉捩點都睇唔到就唔可以話自己係忠實fans喇
好多時d人都會話鍾意睇以前逃學威龍年代既周星馳
但其實如果一個人五十幾歲仲用屎尿屁or誇張表情動作黎拍喜劇的話
佢會唔會無進步過呢?
我從來都唔覺得周星馳私底下會係一個好nice既人
或者佢工作上要求好高
但佢亦都係不斷有提攜一D佢欣賞既人
好似呢套戲唐牛一個咁重要既角色
佢比左當時一路都做幕後既谷德昭做
仲有田雞 劉以達同埋八両金
physically既搞笑就等佢地負責啦
同埋食神我最鍾意既就係佢首尾呼應既結局而呢個重任就交比佢喇
你額有朝天骨 眼中有靈光 仙人轉世 神仙下凡 終於比我等到你!
係一個周圍都係神仙(?)既廟街入面
史提芬周遇上火雞
到最後佢地係同一個地方遇返
而火雞已經變左一個索女仲要最後史提芬周幫佢畫左個心!!!
睇左九萬次都尖叫架我!!
好! 係時候考下大家對於食神金句既熟悉度
準備好啦嘛?
黎喇喎!
- 歐海棠做既司儀講左D咩介紹食神呢?
答案:
佢高傲 但係宅心人厚; 佢低調 但係受萬人景仰; 佢可以將神賜俾人類既火運用得出神入化 做出堪稱火之藝術既菜式! 究竟佢係神既化身 定抑或魔鬼既使者? 冇人知 但係有一樣o野可以肯定既 每個人都會俾一個稱號佢 --- 食神!(其實我真係好鬼鍾意佢句"無人知")
- 情與義 值千金你就識唱喇 後面果幾句係咩你又知唔知先!
答案:
情與義，值千金，刀山去地獄去有何憾。為知心犧牲有何憾，為嬌娃甘心剖寸心
(大聲叫: 好兄弟!)
血淚為情流，一死豈有恨，有誰人敢過問。
- 甜筒輝做既美美美美美美國哈佛大學畢業生Richard都搞到史提芬周講左句好經典既金句架喎 記唔記得先
答案:
咦?! 阿Richard個樣好Richard喎!
(利申: 細個睇係睇唔明架 大左睇笑到癲左囉!)
- 送分題: 史提芬周講左句咩搞到火雞同基哥要大家排晒隊輪流講一次呢?
(應該真係無人唔知架喎!!)
答案:
爭咩丫 撈埋黎做個瀨尿牛丸丫笨!
- 最後一題 呢條都唔知既話我極度懷疑你唔係香港人!
方丈人品係如何架先?
答案:
喂呀打都廢事喇
自己睇啦~
其實呢
唔知由幾時開始真係好多人都會話自己唔鍾意睇周星馳
又或者覺得最好笑既周星馳時代已經過去
其實係咪真係咁有需要計較呢樣野呢?當一個人拍得出咁多套大家都有睇過既戲
仲要每套你都UP得出D野既時候
唔係就已經代表左呢個人有幾大貢獻啦咩?
對我黎講
周星遲另外令我好欣賞既點係
佢令到我地呢D 80後會識左好多對上一個年代既野
例如呢套戲入面既情與義令我知道佢原來係陸小鳳首主題曲黎既
(其實仲有好多 不過呢篇講食神其他戲既例子唔講住)
所以同屋企人一齊睇果時真係全家都識笑
我認既
而家佢唔會再拍呢D純粹比香港人睇既戲
但其實佢有無忘本呢淨係上一次美人魚佢要整首世界始終你好入去
仲洗講咁多架咩?
拿我知一定有D FANS嫌我金句講得唔夠多都夠膽開POST
其實我用心良苦想引下大家自己重睇一次食神je!~
金句咁多其實點數得晒ㄚ
自己乖乖地趁住週末睇一次咪幾好囉
link都比埋你喇仲想點
睇完不如都like下我個fb page啦~
https://www.facebook.com/gryffindor103
請按此登錄後留言。未成為會員? 立即註冊