盧根係果種唔識用把口去表達對你嘅愛,但係會用條命來愛你嘅人(盧根 無劇透影評)

戲如人生 於 04/03/2017 發表 收藏文章
「最鋒利嘅刀都有生鏽嘅一日」,正正就係盧根嘅寫照。或者生鏽嘅唔係佢對鋼爪,而係佢個心。


又man又好打嘅狼人,殺人唔眨眼,打打殺殺過咗大半世,可以話係做咗成世「浪人」。家陣壯士暮年,不復當年勇,連自癒能力都大不如前,甚至連伸對爪出來都會整傷手。後生果時打壞人、救世界,一圓英雄夢,而家只係想低低調調過日子。更慘嘅係,同佢有關連嘅人多數都唔會留得喺佢身邊:佢愛嘅,比佢嘅敵人殺死,佢嘅敵人,比佢殺死,加上本身衰老得比一般人慢,所以盧根嘅下半世可以話係一條友孤零零過。睇住自己年華老去,風光不再,開始對世界有啲麻木,搵唔到生存落去嘅意義。

天意總係弄人,喺盧根心灰意冷嘅時候,偏偏突然發生嘅事同出現嘅人令佢唔可以唔置身事外。依隻伏櫪老驥慢慢體會到生命嘅美好,亦因為勢所迫而漸漸搵番自己塵封多年嘅熱血。一生獨來獨往嘅佢終於搵到一個值得佢捨身保護嘅人,一個值得捍衛嘅信念。咁難得先搵番對佢有意義嘅嘢,咁難得先重燃鬥志,但今時今日嘅盧根已經係個跑兩步都氣喘嘅阿叔,更加唔好話要保護身邊嘅人。依個時候相信觀眾都會感受到盧根果種無力感,內心兩個諗法嘅角力:打又有心無力,但唔打又死硬。


套戲無乜多餘嘅內心獨白,反而係透過角色之間嘅交流同整體氣氛嘅烘托,令你好自然對盧根內心嘅掙扎同無力感感同身受。以往睇X-Men或者上幾集狼人都係睇佢點樣用一對爪好似切菜咁將敵人打到落花流水,今次出現得較多嘅係佢俾人屌打,真係唔認老都唔得。生命好多時都咁,有能力嘅時候你覺得無意義,當你搵到意義嘅時候又有心無力。

兩個演員演技都好精湛,特別係飾演蘿拉嘅小妹妹(我覺得佢睇落有啲似Cara Delevingne),雖然細細個但係老老積積咁,凌厲嘅眼神比人一種入世已深而且憤世嫉俗嘅感覺。而飾演狼人嘅曉治積曼更加係將依個老年角色淋漓盡致咁演繹出來。大大話話做狼人做咗十幾年,可以話係演活咗依個角色,啲人一見佢就諗起佢係X-men個狼人(就好似羅拔唐尼=Iron Man咁)。而今次佢飾演嘅唔再係一隻好勇鬥狠嘅野獸,而係一個只想安度晚年嘅阿叔。今次嘅盧根佬味十足,戰鬥同歲月喺佢身上留低嘅痕跡充滿滄桑,令人覺得佢已經厭倦戰鬥,厭倦人生,直情係有種「你唔迫我發火嘅話,我寧願繼續做隻病貓」嘅感覺。今集嘅盧根更加嚴肅,更加寫實,曉治積曼出色嘅演技可記一功。兩個角色由互不相干,到慢慢展現一種含蓄嘅愛,最後嘅結局亦令人感觸。盧根就係果種唔識用把口去表達對你嘅愛,但係會用條命來愛你嘅人。


作為繼《Deadpool》後第二套被列為三級嘅Marvel英雄片,血腥暴力係難免架啦,不過風格上同《Deadpool》截然不同。《Deadpool》裏面嘅動作更為誇張,畫面亦都比較華麗同鮮艷,睇落比較似做緊體操,Deadpool斬人果時就好似畫緊畫咁,好有藝術,咁嘅手法係刻意為觀眾帶來視覺上嘅沖擊同滿足。相反,同樣係三級嘅《盧根》雖然都係充滿打鬥,但多數畫面相對上比較灰暗,帶啲塵土飛揚,相信係符合返老年盧根比人嘅感覺。再者,兩個角色嘅打鬥風格係有啲唔同。Deadpool打嘅時候跟本完全屈機(如果你熟Marvel嘅話你應該知連死神都吹佢唔脹),所以佢打交唔洗驚輸,而且本身口賤抵死,佢殺人嘅同時係追求箇中樂趣同美感,招式華麗得來,仲要奚落對方一番,直情好似打機咁。而盧根喺今集入面係飾一個求生自保嘅人,喺比人屌打果個,當然身邊仲有其他包袱。所以,盧根嘅打鬥來得更加簡單直接,拳拳到肉,爽手打死你然後走佬就算,唔得閒諗點樣打得型啲、點樣寸你。一對鋼爪伸出伸入,係為咗抵禦敵人,唔再係好似後生果時咁生靈塗炭;流既每滴血、中嘅每粒子彈,係為咗保護愛嘅人。


雖然依套係超級英雄電影,但比起特技同動作,佢更出色嘅地方係透過一老一嫩主角嘅遭遇同佢哋之間微妙嘅關係去描繪出果種「寶刀已老」嘅無力感同埋盧根對蘿拉果份含蓄嘅愛,亦為狼人傳奇嘅一生劃上句號。

*圖片來源: 互聯網



標籤: 電影  Marvel  狼人  Logan  盧根  英雄  曉治積曼  

留言

會員
我要評論
請按此登錄後留言。未成為會員? 立即註冊
  • tony 哥
    tony 哥 於 05/03/2017 評論 NO. 1

    套戲幾感動

  • What I Learned From Movies
    What I Learned From Movies 於 05/03/2017 評論 NO. 2

    You sure you didn't give away spoiler in your title?

  • Sam Sam
    Sam Sam 於 06/03/2017 評論 NO. 3

    狼叔😢😢

快捷鍵:←
快捷鍵:→