考過2次DSE, 我有d野想講... 精選

讀咗書成10幾年，
好似為既都係一場DSE，
DSE一衰你10幾年既努力就玩完。
曾經有人咁樣講過，
考一次公開試會短幾年命，
依樣我肥姨姨係相信既。

一日覆一日嘅無了期既溫習，
考試前夕因為擔心緊張嘅失眠夜，
試場被陌生「對手」包圍嘅氣氛，
一份份粗糙又冷冰冰嘅試卷難題，
身旁考生短促而刺耳既揭紙聲，
每一樣野既加乘都將本來既壓力再推至臨界點。

「捱下啦，個試好快考完」
其實宜加回想，
考試並唔可怕，
可怕嘅係佢將人分成唔同嘅等級。

有2級既人，
亦有5**既人，
2級既人似乎就係蠢就係失敗，
而5**既人就係天之驕子話頭醒尾。

考得好肥姨姨固然恭喜你，
話晒你付出嘅努力都得到左成果，
考得唔好會有一時嘅迷惘，
依個都正常，
畢竟人哋付出更加多嘅努力係「讀書」依件事上，
但幾年內你一定會搵到自己既目標。
有句說話講得非常之啱，
出到嚟入行做野，
每個人都係初哥，
講經驗講能力講關係，
冇人會再問你當初拎過幾多條5**，
亦冇人會再問你當初拎過幾多條2。


話知你拎過7條5**，
做錯野都係要企定定咁樣喺度俾人鬧到狗血淋頭。

話知你名校狀元，
老屎忽點你去搬搬抬抬你就要搬搬抬抬。

話知你英文嘞嘞聲，
你老細就係鍾意叫你返大陸做野就返大陸做野。

醒嘅人去到邊都係醒。

放低你5**既身段，
唔好再介意你公開試既成續，
盡情奶你老細鞋底奶到又光又靚，
做咩都好，比d志氣，
用你全力力爭上游，先為生存秘訣。
話晒DSE係功成名就既你以後回想返嘅時候,
都只不過係一張沙紙。