做人唔係讀書,好似驗算多幾多次都係錯。

姨姨哦哦 於 22/10/2016 發表 收藏文章
「萬官皆下品 唯有讀書高」
依句對於我黎講難聽過粗口既說話
由我小一小二已經由我娘親把口,
不斷好似Bedtime story咁每日話比我聽。


「唔讀書做到d咩阿,你答我」
因為一次小學默書唔合格,
阿媽法官上身咁向我質問。
當時雖然我毛都未有條,
但膽上面d毛呢係生齊左。

我企後一步,
一隻腳大力向前一踏,
頭傲氣咁向上一抬。

「做狗囉,你未讀過書都可以吠吠吠」

腥風血雨。

個日既晚餐我已經唔記得左食過d咩,
印象中有一道「炆豬肉」,
但我唔清楚究竟係用「藤條」、「拖鞋」?
定係「鐵通」同「單車鏈」?

阿媽打我唔係因為我個次默書漏左邊個英文生字,
係因為「尊重」2隻字教左十幾年都未學識。

係因為我連人都唔識做。
讀書有幾重要相信真係唔洗我講,
如果請你地老豆老母黎講可以講番個357日。

十幾年後發現
做人如果好似讀書,
其實幾簡單。

老師問1+1,
你就答佢2。

2+2呢?
4。
唔條3唔係5。
答案只有一個。

4。

係,岩既答案只有一個,唔信你就驗算。

做人呢?

一次係醫院實習既時候,
一個小妹妹怕怕醜,
彈下彈下,咁行過黎問我地一班同學。

「姐姐,嫲嫲幾時出得院阿,我想同佢食大家樂下午茶啊」
小妹妹講完,
笑嘻嘻咁望住我地,
個時我知原來「小狗臉」係形容依種咁得人憐愛既人。

我笑一笑後開口,
用沉厚而溫柔既聲線答佢:
「小妹妹,你等嫲嫲休息多陣,嫲嫲好番咪同你去食雞肶紅豆冰囉」

等陣。sor9。

依一句其實係我腦到無講出口,
因為當小妹妹一講完野個刻,
我地身邊一個中年女醫生,
用佢把劏雞都無咁嘈既聲,
劃破左天際。
劃破左小妹妹既玻璃心。

「出院?佢唔出得院架,佢出院無人睇住佢,唔通你睇住佢?你讀多d書,第時做個醫生,咪幫到你嫲嫲囉」

原諒我好少形容詞,
但我只可以話我睇到呆撚左。
你問我世界上係咪真係有依種人,
SORRY,
我親眼目擊佢地,
我唔可以話無。

小妹妹聽到一頭霧水,
我諗係因為係小妹妹既世界入面,
佢只不過係問緊可唔可以同嫲嫲食大家樂下午茶。
咩睇唔睇住咩讀唔讀書咩咩咩。

年幼既小妹妹其實都明白依個係一個Simon Cowell 式既「No」。
好似受辱咁急急腳跑走左。

我望住小妹妹細細粒既背影好似成長左。

讀咁多書,其實你識做人咩。
識做咁多Paper,
識答咁多問題,
小妹妹一條問題都答得咁撚差。
我真係想我阿媽請佢食餐咩鳩「炆豬肉」

好。其實佢都係講實話姐。

你估好似我咁Tum個妹妹,
個結果會好d咩?

2星期後,婆婆過左身。
細個覺得讀書難,
大個覺得
「讀書算咩阿,其實做人仲難。」

做人唔係讀書,
好似驗算多幾多次都係錯。

留言


請按此登錄後留言。未成為會員? 立即註冊
    快捷鍵:←
    快捷鍵:→