Deliveroo下月撤出香港 keeta小編發文抽水 被網民批貓哭老鼠：學下IKEA啦 精選

外賣平台 Deliveroo 戶戶送昨日宣布將於 4 月 7 日起撤出香港，有學者歸因另一外賣平台 Keeta 進入香港市場時「燒銀紙」搶客，無奈只能止蝕離場。而 Keeta 在昨晚 Threads 上出 Post「抽水」感謝對方，但內容被狠批貓哭老鼠。
Deliveroo 宣布撤港後，Keeta 在昨日於 Threads 上發文：「🦘呢9年辛苦你了。應承你，我哋會繼續守護每個香港胃。將新鮮熱辣嘅美食用最快速度送到每一戶🫶🏻~」然而，網民似乎並不買帳，接連留下負評，指稱Keeta是「落井下石、劣幣驅逐良幣的代表作」，狠批 Keeta 方欠缺風度。
而更因為 IKEA 同日也在 Threads 上發佈貼文，其中提到「戶戶都會掛住你」，特意以戶戶送的品牌顏色標示「戶戶」這兩個字，引來網民讚賞：「多謝你願意放棄自己隻黃色，用佢哋嗰隻藍色紀念佢地」、「全世界嘅小編我只佩服你哋」、「識英雄重英雄！ 你同袋鼠都係出色既小編，希望你公司頂得住！」、「ikea請埋 deliveroo_hk 小編啦」。