空姐坐85折的士想拎正價收據 司機出妙計斷正！ 精選

有時大家想貪平以及方便都會叫「85折的士」，但近日就有一位空女想搭85折的士後疑似想 Claim 數，到達目的地後要求司機列印列明正價的收據，卻被司機出一招妙計斷正，事主更以「真係大開眼界」去形容。
該名空姐在 IG 限時動態上貼出一張的士收據，而在該收據上就寫住她於12月18號凌晨五點乘搭的士，全程車費206.6元，不過在上方就打了大大個印寫住「85折實收 $176」，雖然當中沒有詳細表明是否用作 Claim 數，不過她就對於司機的行為感到震驚，並在旁邊寫上「搭左咁多次的士，第一次見到咁嘅單，真係大開眼界」。
因為該發言令不少人以為她是為 Claim 數才對此不解，因此引來不少人討論，有人對司機的行為大表讚同「師兄做得對」、「做得啱」、「係咪叫做85都要有尊嚴」；不過都有人反對司機的行為「簡直係倒自己米，佢之後唔會call你車 」、「司機繼續咁玩，越多客就會去call uber」、「做八五折學乜人講尊嚴」、「咁有骨氣就唔好做85折啦，做得就預咗同流合污，仲覺得自己好聰明 」。