狂迷唱黎明情歌 山寨蔡楓華冧樂基兒

轉載自: 蘋果日報 30/04/2011

天王嫂樂基兒（ Gaile）噚日喺旺角出席代言嘅護膚品 Neutrogena記招， Gaile喺台上主持破冰儀式，畀突然爆破嘅紙炮嚇親，不過都唔夠場外驚嚇。 Gaile接受訪問時，吸引場外一位扮到成個蔡楓華咁款嘅男士、拎住自製假咪、嗌破喉嚨大唱 Gaile老公黎明（ Leon）嘅情歌《那有一天不想你》同《今夜你會不會來》，又勁 chok樣同飛吻，全場都為之側目， Gaile聽到都忍唔住偷笑。
Gaile話咁多人喺度冇驚過，仲好搞笑話：「佢可能係 Leon嘅歌迷。」 Gaile仲話會畀個讚賞佢，因為喺咁多人面前唱歌好有勇氣，都唱得好好聽，佢話平時 Leon就冇咁唱過歌畀佢聽，但佢會將件事講畀 Leon知， Gaile又話：「可能佢想表演，我喺美國大，街邊都見好多人唱歌，可以當佢藝術家。」

讚老公投資叻

啱啱喺美國返香港嘅 Gaile話，已經同媽咪預祝咗母親節，老公因為拍戲冇同行，佢仲讚老公拍戲瘦咗好多。問佢老公係咪更加靚仔？佢甜絲絲話：「差唔多，以前都 OK。」講到有傳張栢芝投資億元買樓， Gaile話本身都有投資，但好多嘢都係 Leon叻過佢喎。